Ekipa AIFAESA hala'o hela inspesaun ba produtu iha armazein Perissos, iha Fatuhada, Dili, Kinta, 06/02/2020. Imajen/ Antónia Gusmão.

DILI, 06 fevereiru 2020 (TATOLI) – Autoridade Inspesaun no Fiskalizasaun ba Atividade Ekonómika, Sanitária no Alimentár (AIFAESA) serbisu hamutuk ho Autoridade Aduaneira (AA) intensifika inspesaun ba produtu iha loja sira, liuliu hosi Xina, hodi evita Coronavirus tama Timor-Leste.

Loja ne’ebé sai alvu ba ekipa AIFAESA no AA maka sira ne’ebé loke hosi sidadaun xineza, nune’e mós loja boot sira seluk.

“Ami halo ona enkontru ho MKAE ne’ebé AIFAESA tutela ba, ami hato’o preokupasaun kona-ba Coronavirus ne’ebé daudaun iha no informasaun katak virus ne’e mai hosi hahán, tanba ne’e ho instrusaun hosi MKAE nian, ami hasai konkluzaun katak tenke komesa intensifika makaas liu inspesaun AIFAESA nian liuliu iha produtu sira ne’ebé mai hosi li’ur, liuliu hosi Xina, iha supermerkadu sira hodi identifika produtu sira ne’e foin tama ka kleur tama tiha ona maka foin akontese Coronavirus”, Koordenadór AIFAESA, Abílio Oliveira Sereno, hafoin reuniaun ho AA iha salaun enkontru AIFAESA, Matadouro, Dili, ohin.

Atu haree fornesimentu ba produtu sira foin tama ou kleur ona, maka AIFAESA koopera ho AA no Kuarentena tanba entidade rua ne’e maka responsavel prinsipál kona-ba merkadoria tama no sai iha territóriu nasionál.

“Iha kooperasaun serbisu ne’e ami ida-idak halo tuir nia knaar atubele evita moras Corona ne’e mai Timór. Ami buka intensifika makaas liután inspesaun, ami mós kontakta ho Organizasaun Mundiál Saúde (OMS) para simu informasaun relasiona ho virus ne’e”, Abílio subliña.

Ekipa AIFAESA nian mós partisipa ona reuniaun entre AIFAESA, Ministériu Saúde no OMS hodi tau ideia hamutuk relasiona ba virus refere.

“Ami simu informasaun hosi AA no Kuarentena katak to’o agora merkadoria ne’ebé sirkula seidauk iha indikasaun hahán hamosu corona Virus”.

Bainhira inspesaun maka deskonfia produtu balu kontaminadu ho Coronavirus maka ekipa AIFAESA foti amostra hodi halo teste.

Atividade inspesaun ba loja boot sira iha Dili, la’ós de’it supermerkadu hosi Xina, maibé ba hothotu. Supermerkadu sira ne’ebé identifikadu maka; Mey Mart Fatuhada, Lisun, Perissos, Kmanek Supermerkadu, Leader, Lda, no Jaco Supermerkadu.

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here