Veteranu sira hosi Suku Camea, Dili, halo konferensia imprensa, 05 fevereiru 2020. Imajen/Osória Marques

DILI, 05 fevereiru 2020 (TATOLI)-Veteranu hosi Suku Camea lamenta ho atetude individu ida ho inisiál MCS tanba lansa mal trata hasoru sira (veteranu-red) iha mídia sosiál facebook.

Iha loron 18 fulan-dezembru 2019, tuku 10:49 Otl;  individu balun ho insiál MCS uza liafuan mal trata no halo defamasaun katak veteranu sira iha Suku Camea ne’e, la’os luta na’in.

“Ami kombatente no veteranu sira husi frente klandestina no armada hamutuk ho kumunidade suku Camea, Postu Administrativu Cristo Rei, Munisípiu Dili, lamenta ho atetude individu sira hanesan tuir mai ne’e MCS (autór) ne’ebé mak halo defamasaun ba kombatente no veteranu libertasaun husi Suku Camea nian liuhosi mídia sosiál facebook,” deklara Portavós Veteranu hosi Suku Camea Dili, António Ribeiro, liu hosi konferénsia imprensa, ohin iha Aldeia Has-Laran, Sucu Camea, Dili.

Veteranu ne’e dehan sira sei aprezenta kazu ne’e  ba polísia no Ministériu Públiku hodi prosesa tuir lei ne’ebé maka vigóra.

Iha parte seluk, veteranu Suku Camea mós lamenta ho atetude joven ida ho inisiál LSC ne’ebé hasai liafuan mal trata hasoru Xefe Suku Camea, kazu ne’e akontese iha loron 2 fulan-dezembru 2019, tuku 19:00 Otl.

Iha loron 30 novembru 2019, tuku 11:40 Otl; kazu mal trata hanesan lansa hosi joven ida ho inisiál ASS, tanba hasai liafuan mal trata hasoru Xefe Suku Camea.

Portavós ne’e esplika kazu hirak ne’e akontese tanba problema hadau malu rai. Tanba ne’e nia husu ba MP atu aselera prosesu ba kazu hirak ne’ebe maka akontese.

Iha fatin hanesan , Xefe Suku Camea, Matos da Costa, preokupa ho atetude autór sira tanba la respeita ona autoridade lokál sira ninia servisu.

Entretantu, Veteranu António Aitahan Matak husu joven sira atu respeita veteranu no autoridae lokál sira.

“Ita labele trata ita-nia lidér sira arbiru de’it nune’e apelu atu labele eziste iha ita-nia rain,” hateten António Ai-tahan Matak.

Jornalista : Osória Marques

Editór      : Francisco Simões