Proreitor Asuntu Akademiku, UNTL, Miguel Maia dos Santos.Imajen/ Tatoli Egas Cristovao

DILI, 4 fevereiru 2020 (TATOLI)–Pro-Reitór Asuntu Akadémiku, Miguel Maia dos Santos deklara, ninia parte halo ona identifikasaun ba estudante antigu sira husi tinan akademiku 2000-2019 hamutuk ema 6.000 husi ema 23.000 la inskreve kuaze dala 10 ona.

Daudaun ne’e, nia hatutan, parte Akadémiku rasik sei aprezenta lista sira ne’e ba Konsellu de Jestaun hodi foti desizaun no agora naran sira ne’e haketak ona iha lista kinur ida hodi anunsiu ba públiku.

“Ami sei anunsiu ba públiku relasiona ho estudante sira ne’e karik balun sei iha interese atu mai universidade, ami sei konsidera sira hodi fó re-admisaun. Maibé sira ne’ebé mak laiha ona interese, ami sei aprezenta lista sira ne’e ba Konsellu de Jestaun hodi foti desizaun lori ba Konsellu Jéral atu haree,” dehan Miguel Maia dos Santos ba Ajênsia TATOLI iha nia knar fatin, ohin.

Nia esplika, desizaun akadémiku nian haketak ona estudante 6.000 ne’e iha lista ketak ida atu loron ida sira mai karik universidade bele fó sertifikadu rekoñesiementu ida ba sira nu’udar estudante ne’ebé uluk frekuenta iha UNTL.

“Ami husi Gabinete Pro-Reitór Ba Asuntu Akadémiku iha obrigasaun halo peskiza atu hatene kondisaun real universidade ida ne’e ninian. Tanba ne’e mak ami deside haketak sira iha repozitoriu ne’e hodi hein desizaun drop out (DO) ka lae husi Konsellu Jéral,” nia dehan.

Entertantu, nia infroma, totál estudante UNTL ne’ebé alistadu iha 2019 hamutuk ema 9.000 resin ne’e kategoria ba rejime espesiál 7.000 no rejime jéral menus husi ema 3.000. Husi estudante 9.000 resin ne’e, nia dehan, hafoin ajusta ho estudante tuan husi 2000-2019 ne’e mak hamutuk ema 25.000

“IIda ne’e konta husi janeiru 2019 nian. Depois tama iha semester II  kuandu Universidade halo fila fali re-inskrisaun iha fulan juñu 2019, estudante hamutuk 25.000 ne’e tun tiha ba 23.000. Agora kuandu tama iha inisiu janeiru 2020, estudante ne’ebé mak mai inskreve foin mak iha de’it ema 18.000. La hatene, sira seluk ba ne’ebé,” esplika.

Jornalista : Tomé Amado

Editór       : Rafy Belo

1 KOMENTÁRIU

  1. Hau nia hanoin..Universida Nasional TL tenki iha ona regra hodi determina estudante nebe liu prazu ka abandona Universidade ona. Regra mos tenki iha ona ba Estudante sira nebe la pasa Disiplina 3 ka 4 ..hau sinti konsidera hodi determina ka DO ona. Mas , regra tenki klaru. Selae..ita maka nune’e hela deit, basa ita koalia konaba kualidade…so dok karik..atu DO estudante deit laiha regra….

HAKEREK NO HATÁN

Please enter your comment!
Please enter your name here