Turista sira ne’ebé mai ho Ró Pacific Explore bainhira to’o iha Ponte Kais Dili, Timor-Leste, 5 fevereiru 2020.Imajen/António Gonçalves.

DILI, 05 fevereiru 2020 (TATOLI) – Kruzeiru MV. Pacific Explorer, ohin, vizita Timor-Leste ho pasajeiru no tripulante ró hamutuk 2.945, totál turista iha 2.072 no tripulante 873, hosi hirak ne’e inklui timoroan ne’ebé hela kleur iha Austrália na’in-30 ne’ebé kontente haree Timór nia beleza.

“Ha’u mai haree Timor-Leste iha mudansa boot, hanesan ema hotu boot ona, ita-nia rain kapás liután”, Timoroan iha Austrália, Fátima Fa Ing, ne’ebé reprezenta nia kolega sira ba Ajénsia TATOLI iha Portu Dili.

Tuir nia katak Timor-Leste uluk no agora diferente tebes, karreta agora barak, ró mós barak, paizajen Timór furak liu, tanba ne’e maka turista sira Austrália barak mak mai hodi haree panorama ne’ebé iha ne’e.

“Ha’u kontente haree Timór, maibé laran mós moras tanba husik Timór kleur ona, maske dezenvolvimentu rai ne’e kapás ona”, nia dehan ho emosaun.

Fátima Fa Ing ho idade 90, husik Timór iha 1978 ba Austrália ho nia família tomak iha momentu okupasaun Indonézia.

“Ha’u agora ferik ona, hakarak mai haree Timór, tanba ha’u tinan 90, maibé Maromak tulun ha’u sei haree fali imi”, nia halerik.

Iha fatin hanesan, Diretór Jerál Turizmu Ministériu Turizmu, Komérsiu no Indústria (MTKI), José Filipe Dias Quintas, dehan ró ne’ebé to’o iha Timor-Leste tuku 7:00 dadeer, hafoin ekipa halo pasa-revista, pasajeiru sira tun husi ró iha tuku 9:00 hodi vizita sítiu turístika sira iha Timor-Leste durante oras ualu nia laran.

“Kruzeiru ne’e mós iha timoroan ne’ebé kleur iha Australia hamutuk 30, sira mós mai vizita sítiu turístika ne’ebé besik iha Dili no Munisípiu Ermera no Liquiçá”, salienta.

Kruzeiru P&O Pacific Explorer mai vizita Timor-Leste ho rute husi illa Bali-Indonézia atu liu bá Darwin-Austrália tanba hetan tratadu (handle) husi ajénsia.

Jornalista : Zezito Silva

Editora : Maria Auxiliadora

HAKEREK NO HATÁN

Please enter your comment!
Please enter your name here