Karta Alerta ne'ebé hasai husi Xefe Postu Administrasaun Aeroportu, Inspetór Polisia Ernesto Maia, iha loron 3 fevereiru 2020, hodi bandu sidadaun Xineza tama Timor-Leste ne’e laloos.

DILI, 05 fevereiru 2020 (TATOLI)- Ministériu Interiór liu husi Diresaun Jerál Servisu Migrasaun Timor-Leste klarifika katak, karta informasaun ne’ebé Migrasaun hasai hodi bandu Xineza hala’o viajen mai Timor-Leste ne’e laloos.

Notísia Relevante : Nasaun Viziñu Sira Hala’o Prevensaun Di’ak, Virus Corona Sei La To’o Timor-Leste

Diretor Jeral Servisu Migrasaun, Superintendente Polisia Agostinho da Silva Gomes. Imajen/Eugenio Pereira

Diretór Jerál Servisu Migrasaun, Superintendente Polisia Agostinho da Silva Gomes, ba Ajénsia TATOLI, ohin, klarifika katak, karta  informasaun ne’ebé fó sai husi Xefe Postu Administrasaun Aeroportu, Inspetór Polisia Ernesto Maia, iha loron 3 fevereiru 2020, hodi bandu sidadaun Xineza tama Timor-Leste ne’e laloos.

Nia dehan, tuir loloos intensaun husi karta ne’e la’ós atu bandu, maibé husu atu halo kontrolu másimu ba sidadaun Xineza sira ne’ebé fila husi Wuhan tenke kontrolu makas sira nia saúde hodi evita virus Corona tama Timor-Leste.

“Informasaun eskrita ne’ebé Xefe Postu Administrasaun Aeroportu hasai iha loron 3 fevereiru 2020 ne’e laloos. Ita la bandu sidadaun Xina atu mai Timor-Leste. Tanba sala interpreta orden servisu. Orden ne’e fó atu halo koordenasaun ho ajénsia aviaun atu Timor-Leste hodi suspende tiha viajen sidadaun estranjeiru inklui sidadaun Xineza ne’ebé deskonfia hetan virus Corona bele hetan atensaun, no karta ne’e válidu de’it ba loron segunda liubá,” Diretór Agostinho klarifika.

Notísia Relevante : Antesipa Virus Corona, MTKI Koordena MS Observa Pasajeiru Ró Pacific Explore

Konteúdu husi karta ne’e ninia validasaun aplika iha loron segunda liubá no too mai ohin loron kontinua halo pasa revista ba sidadaun sira tuir prosesu normál.

Superintendente Polisia Agostinho hatutan, karta ne’e hasai bazeia informasaun ne’ebé públiku sira lansa iha média sosiál katak, deskonfia sidadaun Xineza ida sofre virus Corona, tanba ne’e, parte Migrasaun konsege tau atensaun atu halo pasa revista no kontrolu másimu iha postu hotu- hotu.

“Karta ne’e hasai bazeia ba informasaun ne’ebé hetan iha loron domingu, ema balun lansa informasaun ba ita nia lider sira katak, pasajeiru ida deskonfia afeta ona virus Corona, no atu ba Dili iha loron segunda. Bazeia ba informasaun ne’e, maka konsulta ho ministru hodi foti desizaun atu suspende tiha pasajeiru sira ne’ebé atu mai Timor-Leste liu-liu ba sidadaun Xina no sidadaun sira seluk, karik mai iha Xina bele fó oportunidade ba sira mai checkup iha Bali hetan ona karta médiku livre ona husi virus Corona foin sira bele mai Dili,” nia esplika.

Notísia Relevante : ONU Prontu Serbisu ho Governu Timor-Leste Kontrola Virus Corona

Ho fallansu ne’ebé iha, Diretór Agostinho, husu deskulpa ba sidadaun Xineza, Timoroan, inklui sidadaun sira seluk, tanba karta ne’ebé fó sai hamosu konfuzaun iha públiku.

“Ba maluk Xineza sira dala ruma la kontente, ami husu deskulpa ba fallansu ne’e,” nia hatete.

Relasiona ho informasaun ne’e, Superintendente Polisia Agostinho mós halo ona koordenasaun ho Xefe Adidu Militár Xina iha Embaixada Xina nian iha Dili Timor-Leste, Kolonel Wan hodi klarifika fila fali informasaun ne’e ba komunidade Xineza sira iha Timor-Leste.

Antes ne’e, Ministru Interior, Filomeno da Paixão de Jesus dehan, karta ne’e sala interpreta, tanba tuir diskusaun iha reuniaun Konsellu Ministru katak, governu Timor-Leste mós halo prevensaun ba kualkér sidadaun Xineza no sidadaun sira seluk kuandu sofre virus Corona maka sei la tama Timor-Leste.

Ministru dehan, Timor-Leste sei livre uitoan, tanba antes sidadaun sira ne’e too mai Timor-Leste sira hetan ona pasa revista makas iha Aeroportu Singapura, Austrália no Bali-Indonézia maka foin too Timor-Leste.

Jornalista   : Eugénio Pereira

Editór        : Francisco Simões