Ministériu relevante halo konferénsia imprensa sobre rezultadu foos Globus ne’ebé la deteta plástiku. Imajen/Maria Auxiliadora.

DILI, 05 fevereiru 2020 (TATOLI) – Rezultadu teste ba foos Globus ne’ebé hala’o iha Laboratóriu INTERTEK-Vietnam la deteta foos ne’e hanesan plástiku.

Iha novembru 2019, publika sai iha mídia sosiál katak foos Globus ne’ebé sirkula iha Timor-Leste ne’e kontaminadu ka fabrikadu husi plástiku. Tanba ne’e, Governu preokupa hodi buka hatene sobre informasaun, nune’e liuhusi koordenasaun liña ministeriál komunika kedan ho kompañia Timor Food ne’ebé hatama foos Globus no iha janeiru ne’e Ministériu Turizmu, Komérsiu no Indústria (MTKI) liuhusi Diresaun Nasionál Regulasaun Komersiál ho empreza lori amostra foos ba teste laboratóriu.

“Rezultadu teste liuhusi nia modelu ou mekanizmu teste ualu indika katak foos Globus ne’ebé Timor Food hatama mai Timór ne’e foos duni, ne’ebé mai husi hare orijinál iha Vietname ninian”, Asesór Prinsipál MTKI, Jacinto Rigoberto, fó sai iha konferénsia imprensa iha Bebora, ohin.

Teste fíziku ne’e hahú halo ho misturasaun ho amostra foos-mutin naruk ho broken 15% ho barómetru broken ho baze 2/3 (broken 2/3 basis), umidade (moisture), miolu kinur (yellow kernels), miolu aat, red and red streaked kernels, chalky kernels 3/4 basis, teste te’in, no sosa. Husi sasukat ualu ne’e la deteta foos Globus hanesan plástiku.

Diretór Departamentu Asuntu Jurídiku no Koordenasaun AIFAESA, Domingos Nunes, dehan boatu ne’ebé fó sai iha Novembru liubá hatudu nia implikasaun ba konsumidór sira oinsá bele iha konfiansa konsome foos Globus no rezultadu teste hatudu di’ak.

“Tanba ne’e AIFAESA apela ba povu Timór bele konsome foos no AIFAESA nafatin esforsu ho ministériu relevante hodi fó garante ba konsumidór sira liuliu ba saúde públika”, aviza.

Xefe Departamentu Nutrisaun Ministériu Saúde, Olinda dos Reis, hatutan rezultadu teste fó indikasaun katak la hatudu hahán refere proibe ba iha konsome públiku nian.

“Tanba ne’e Ministériu Saúde fó apoiu nafatin inisiativa ba serbisu sektorál ne’ebé la’o ona, sei nafatin kontinua asegura konsome ba iha ai-han públiku bele fó valór nutrisaun di’ak no bele ajuda hadi’a kestaun saúde públika iha Timór”, afirma.

Diretór Operasaun Alfándega, Julio J. Ximenes, salienta husi parte Autoridade Aduaneira sempre iha koordenasaun ho instituisaun relevante no normalmente serbisu halai liubá komérsiu internasionál, presiza asegura ba prosedimentu ne’ebé iha.

“Kestaun ne’e mak sempre iha kontrolu no haree liubá merkadoria no mós rekizitu oinsá bele prienxe ba importasaun no esportasaun ne’ebé sirkula iha territóriu”.

Diretór Nasionál Kuarentena, Venâncio Oliveira, husu ba distribuidór foos tenke mós prienxe kritériu ante hatama foos, bá uluk Kuarentena tanba iha rekizitu balun iha, kuandu iha informasaun laloos hanesan ne’e, Kuarentena bele fó sai katak produtu ida ne’e la’ós falsu, maibé iha kualidade atu ema konsome.

“Bá futuru, liña ministeriál bele halo ekipa ida para bele kontrolu ba distribuidór sira iha Timór hodi bele hatene kle’an (foos) ne’e mai husi ne’ebé”, sujere.

Komandante Polísia Munisípiu Dili, Armando Monteiro, dehan Polísia fó apoiu ba programa Governu ligadu ba preokupasaun konsumidór no empreza no husu mídia atu fó informasaun loloos tanba ohin loron, estabilidade polítika nasionál ema balun aproveita hodi lansa propaganda hodi aproveita oportunidade hamonu kompañia importadór no konsumidór sira hodi hetan benefísiu ba atividade ne’ebé halo.

“Tanba ne’e labele rona no fiar ajitasaun ne’ebé la’o hela, maibé fó fiar nafatin se rona propaganda iha mídia tantu iha komunidade bairru karik informa ba AIFAESA no mai direta ba postu integradu ne’ebé halo atendimentu tantu Kuarentena, Alfándega, Saúde, MTCI no Polísia ne’ebé besik hodi nune’e ita buka tuir autór sira hodi lori sira responsabiliza ba aktu ne’ebé halo tanba atividade ne’e krime ekonómika hodi kria konfuzaun ba públiku”.

Na’in ba Empreza Timor Food, James Jong, fó obrigadu ba konsumidór iha territóriu ba konfiansa ne’ebé fó ba foos Globus dezde 2000 no kompañia iha responsabilidade morál ba negósiu.

“Durante foos ne’e tama nunka hetan problema, antes foos tama mai, ró deskarrega iha portu no Alfándega no Kuarentena sempre check, ne’e mak ha’u fó garantia konsumidór labele dúvida no kontinua sosa foos. Kompañia iha obrigasaun atu asegura seguransa alimentár”, katak.

Ho publikasaun iha mídia sosiál sobre foos Globus halo husi plástiku fó efeitu ba empreza ne’e tanba konsumidór dúvida uitoan no ikus laiha prova sobre foos plástiku maka laiha ona impaktu ba sira. Timor Food kada fulan importa foos kuaze tonelada 7000 mai Timor-Leste ne’ebé prodús husi empreza KIGIMEX, Vietname.

Jornalista : Maria Auxiliadora

Editór: Rafy Belo

HAKEREK NO HATÁN

Please enter your comment!
Please enter your name here