Prezidente Autoridade RAEOA-ZEESM, José Luís Guterres ‘Lugu’. Imajen Tatoli/António Gonçalves.

DILI, 05 fevereiru 2020 (TATOLI)—Prezidente Autoridade Rejiaun Administrativa Espesiál Oé-Cusse Ambeno (RAEOA), José Luís Guterres, fó-sai katak nomeasaun ba membru autoridade sei iha prosesu.

“Atu dehan ba imi katak nomeasaun ba sekretáriu rejionál ne’e iha prosesu. Ami hakerek ona karta ba iha líder partidu polítiku sira, balun ami simu ona maibé balun seidauk. Ne’ebé, ho ita-nia respeitu tomak ba ita-nia instituisaun polítika iha rai-laran, ne’e mak to’o agora ami seidauk halo nomeasaun”, nia dehan ba jornalista sira, iha rezidénsia Autoridade RAEOA/ ZEEMS, Farol, Dili, kuarta ne’e.

Nia hateten, atu responde aban ka bainrua ne’e depende de’it ba resposta karta ne’ebé haruka ona ba partidu polítiku sira.

Lee mós: Eis Sekretária Rejionál RAEOA Kestiona Asesór Aprova Orsamentu

“Ha’u atu dehan ba imi, sekretáriu rejionál balun agora sai hanesan asesór para kontinua prosesu. Ami hakarak memória institusionál. Tanba ne’e, administrasaun foun ida-ne’e ami hakarak halo buat ida tuir dalan maibé benefísiu ne’e ba povu Oé-Cusse”, nia esplika.

Prezidente RAEOA ne’e afirma, nomeasaun tenke iha prosesu formál ida hodi lidera ezekutiva iha Oé-Cusse.

“Maibé, to’o agora ne’e ita-nia prosesu partisipasaun iha dezenvolvimentu iha rai Oé-Cusse kontinua nafatin. Saláriu la’o hela no administrasaun mós la’o hela. Ami halo buat ida-ne’e di’ak ba ita-nia rai”, José Luís argumenta.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here