José Luís Guterres. Imajen espesiál

DILI, 05 fevereiru 2020 (TATOLI)—Prezidente Autoridade Rejiaun Administrativa Espesiál Oé-Cusse Ambeno (RAEOA), José Luís Guterres, hateten molok autoriza asesór aprova orsamentu hodi selu saláriu funsionáriu no obra sira iha rejiaun refere, nia konfirma ona parte legál sira.

“Antes halo buat sira-ne’e hotu ha’u konsulta advogadu sira para haree. Buat ne’e simples. Ema hanoin dalaruma ita kala ulun la loos karik ka la hatene konsulta ema. Ami konsulta nune’e administrasaun iha rai Oé-Cusse labele para”, nia dehan ba jornalista sira, iha edifísiu RAEOA/ZEESM, Farol, Dili, kuarta ne’e.

Lee mós: Eis Sekretária Rejionál RAEOA Kestiona Asesór Aprova Orsamentu

Prezidente Autoridade RAEOA ne’e hakarak prosesu ne’ebé Eis-Prezidente RAEOA, Marí Alkatiri rai hela tenke iha kontinuidade, nune’e administrasaun iha rejiaun refere kontinua la’o bá-oin.

“Ida-ne’e mak objetivu esensiál. Se ema la koopera ita tenke toma medida tuir lei, konsulta buat sira-ne’e hotu. Ita labele haree ema hotu hanesan asesór maibé balun ne’e tékniku superiór sira. Ema balun esperiénsia nanis kedas iha finansa. Ami konsulta mós ho Ministériu Finansa, ami konsulta mós banku, ami halo buat ne’ebé tuir lei”, José Luís esplika.

Prezidente Autoridade ne’e hakarak de’it kria pás no estabilidade iha rai Oé-Cusse no fiar katak povu hosi rejiaun refere hakarak mak pás no estabilidade.

“Sira-nia kultura pasífika respeita ba ema, ne’ebé ha’u laiha problema kona-ba orsamentu ne’e”, nia informa.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here