Eis membru Autoridade RAEOA ko'alia ba jornalista hafoin hasoru-malu ho Eis Prezidente RAEOA, Marí Alkatiri. Imajen Tatoli/Evaristo Soares Martins

DILI, 05 favereiru 2020 (TATOLI)—Membru Autoridade Rejiaun Administrativa Espesiál Oé-Cusse Ambeno (RAEOA), termina ona mandatu iha 1 janeiru 2020.

Ho mandatu ne’ebé hotu ona iha loron 1 janeiru, Eis Sekretária Rejionál Finansa RAEOA, Leonia Monteiro no eis membru auoridade balun hasoru-malu ho Eis Prezidente RAEOA, Marí Alkatiri kona-ba mandatu ne’e.

Membru autoridade ne’ebé termina ona mandatu mak hanesan Leonia Monteiro, Arsénio Paixão Bano, Pedro Sousa, Francisco Xavier Márques, Regio da Cruz Salu no Inácia Teixeira.

“Ami membru sesante Rejiaun Administrativa Espesiál Oé-Cusse Ambeno mai hasoru Doutór Marí Alkatiri katak ami-nia serbisu hotu ona no ami iha funsaun no atividade seluk ne’ebé iha ona”, Leonia Monteiro, informa ba jornalista sira hafoin hasoru-malu ho eis Prezidente RAEOA, Marí Alkatiri, iha edifísiu Eis Titulár, Farol, Dili, kuarta ne’e.

Eis Sekretária Rejionál Finansa RAEOA ne’e informa katak Xefe Gabinete RAEOA foun, Agostinho Caet halo informasaun ida katak sira la konsege rai hela serbisu ruma no hateten abandona serbisu, maibé informasaun sira-ne’e la loos.

“Atu klarifika ba públiku katak membru autoridade nia mandatu tinan-lima. Ita hotu hatene katak loron 30 jullu 2019, Doutór Marí Alkatiri hanesan Prezidente Autoridade mandatu hotu ona no mós membru autoridade na’in-neen nia mandatu ramata iha loron 1 janeiru 2020. Prezidente sesante, Marí Alkatiri fó interinamente ba Arsénio Bano durante loron 120 nune’e Governu bele prepara nomeasaun ba Prezidente Autoridade foun”, nia esplika.

Maibé, nia haktuir, seidauk to’o loron 120, Primeiru-Ministru, Taur Matan Ruak, nomea ona Prezidente Autoridade foun, José Luís Guterres.

Tanba ne’e, Eis Sekretária halo karta ida iha loron 11 dezembru haruka ba Primeiru-Ministru, Taur Matan Ruak, informa katak membru sesante nia mandatu hotu ona tanba tuir rezolusaun Governu ne’ebé aprova membru autoridade ba tinan-lima.

Nune’e mós, haruka karta ida ba Prezidente RAEOA foun, José Luís Guterres dehan sira-nia mandatu hotu ona, nune’e bele halo fali proposta ida ba Primeiru-Ministru, Taur Matan Ruak para bele nomea ona membru autoridade foun.

“Maibé, fulan tolu ona seidauk iha membru autoridade foun. Entaun, ami membru autoridade sesante ne’ebé mak ramata tiha ona mandatu mai ko’alia ho Dr. Marí Alkatiri katak fulan tolu ona seidauk iha membru foun autoridad iha Oé-Cusse”, Leonia Monteiro katak.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here