Diretór Serbisu Agrikultura Munisípiu Aileu, Gallieni Sebastião da Costa Galhos. Imajen TATOLI/Antónia Gusmão.

AILEU, 05 fevereiru 2020 (TATOLI) – Ministériu Agrikultura no Peska (MAP) Munisípiu Aileu hetan difikuldade ba manutensaun tratór, nune’e la konsege fó assisténsia másima ba komunidade hodi fila rai gratuita.

Maski nune’e, iha 2019 MAP Aileu konsege tulun komunidade hodi fila rai gratuita hamutuk ektare 50.

“Ami iha difikuldade manutensaun ba trátor, tanba ne’e mak ami lakonsege fó asisténsia másima fila rai gratuita ba komunidade, tanba ne’e maka ami apoia ektare 50”, Diretór Servisu Agrikultura Munisípiu Aileu, Gallieni Sebastião Franklin da Costa Galhos, ba TATOLI iha suku Fahiria, Postu Administrativu Aileu Vila, Munisípiu Aileu, ohin.

Nia hatutan, apoia fila rai gratuita ba komunidade atu kuda batar tuir tempu ne’ebé maka determina, liuliu udan.

Agrikultura Munisípiu Aileu iha tratór neen, maibé haat kondisaun aat no labele halo manutensaun tanba tarde ona, no rua maka halo operasaun tanba ne’e labele fó asisténsia másima ba komunidade, liuliu fila rai gratuita hodi kuda sira-nia batar no produtu seluk.

“Serbisu ne’ebá maka ami halo iha Munisípiu Aileu maka ami halo intervensaun hanesan tempu époka ami apoia fila rai gratuita, apoia distribuisaun fini, fó asisténsia téknika balu hodi fó vasinasaun ba animál”, katak.

Diretór ne’e espera katak iha 2020 ne’e bele halo ona manutensaun ba tratór sira hodi fó apoia di’ak liután ba komunidade, nune’e bele prodús batar barak hodi sustenta ekonomia família.

Jornalista : Antónia Gusmão
Editora : Maria Auxiliadora

HAKEREK NO HATÁN

Please enter your comment!
Please enter your name here