Diretór Jerál Prestasaun Saúde Interino, Horacio Sarmento. Imajen: Felicidade Ximenes

DILI, 05 fevereiru 2020 (TATOLI)-Diretór Nasionál Servisu Hospitalar no Emerjénsia, Horacio Sarmento infroma, iha  fulan janeiru no fevereiru 2020 pasiente ne’ebé mak hala’o tratamentu iha rai liur hamutuk ema na’in 27.

“Iha janeiru-fevereiru 2020 ne’e, pasiente foun ne’ebé ita haruka ba mak na’in 27 inklui mós pasiente sira ne’ebé mak ita haruka uluk ba. Pasiente sira ne’e hala’o tratamentu iha Bali, Jakarta, Singapura  no Malasia tanba sira hetan sofre moras rins, onkolojia no moras fuan tanba ita-nia fasilidade seidauk kompletu,” dehan Horacio Sarmento ba jornalista sira iha nia knaar fatin, ohin.

Pasiente hirak ne’e, nia hatutan, balun fila ona mai Timor-Leste no kada fulan ida ka rua mak ba halo fali follow up hodi halo teste ne’e mak hamutuk ho numeru 27 ne’e.

“Iha tinan kotuk-2019 nian  pasiente sira n’eebé mak baixa iha Bali no Jakarta ne’e hamutuk pasiente 50 mak sei iha ne’ebá,” nia informa.

Nia relata, iha 2019 ne’e pasiente ne’ebé mak ministériu saúde haruka ba iha rai liur hodi halo tratamentu mak hamutuk ema 182. Husi pasiente hirak ne’e, nia infroma, 97% mak fila ho saúde di’ak maibé  husi 3% mak fila hikas ba Maromak nia uman.

Atu redus moras tolu refere, nia haktyuir, Governu bele instala no dezenvolve uluk sentru ida iha HNGV mak hafoin halo kooperasaun ho “eHeal Medikál Center Malázia”.

“Agora daudaun, ita atu estabelese tan sentru klinika ba iha fuan nian iha HNGV. Agora sei iha faze konstrusaun ka reabilitasaun nia laran,” nia haktuir.

Nia haklaken, fatin cardiolojia nian ne’e komesa book ona tanba orsamentu ba ida ne’e iha 2020 ne’e tau millaun $1 para hodi estabelese sentru Cardiolojia ne’e.

Maibé, nia hatutan, agora orsamentu sumba iha Parlamentu Nasionál no espera katak Governu foun fali orsamentu ne’e mantein nafatin para estabelese sentru Cardiolojia ne’e rasik.

Entrettantu, nia haklaken, pasiente ne’ebé barak hela iha liur ne’e mak pasiente onkolojia nian ne’ebé hafoin halo operasaun no halo kemoterapia durante fulan tolu ka fulan haat tanba sira-nia orariu ne’e semana rua dala ida. Entaun, sira ne’e mak hela kleur iha ne’ebá entaun kustu orsamentu ba alojamentu iha tratamentu mós makaas.

Kona-ba moras rins ninian, nia dehan, Governu buka hela meiu oinsá para buka tan fatin mákina hemodialisis maibé dalaruma haruka pasiente sira ba rai liur opera de’it. Atu fase raan, nia esplika, pasiente sira fila mai mak fase raan iha Timor-Leste.

Jornalista : Felicidade Ximenes

Editór        : Rafy Belo

HAKEREK NO HATÁN

Please enter your comment!
Please enter your name here