Konselleiru Embaixada Brazil ba TL, Octavio Lopes oferese livru ho totál hamutuk 100 ho konteúdu oioin ba Ministériu Negósiu Estranjeiu no Kooperasaun (MNEK). Imajen: Nelia Borges

DILI, 05 fevereiru 2020 (TATOLI)-Koordenadór Institutu Estudu Diplomátiku (IED) MNEK, Aurélio Guterres informa, Institutu Estudu Diplómatiku (IED) iha pilar haat ne’ebé tuir planu, sei fo formasaun kona-ba diplomasia ba ema iha Ministériu Negósiu Estranjeiru (MNEK) nian maibé mós ba públiku.

Nia hatutan, pilar ida kona-ba formasaun aprovizionamentu, ensinu aprendijazen, dezenvolvimentu kurrikulár, no pilar peskiza no investigasaun, no mós aspeitu ida fali kona-ba dezenvolvimentu Institusionál.

“Porenkuantu, formasaun hala’o iha ne’e liu-liu ba klaster koñesimentu jerál no lideransa iha diplomasia ne’e oinsá. Ne’e klaster boot ida, nível ne’e post graduada bele lori fulan neen to’o tinan ida. Klaster ida fali lideransa ho diplomasia ne’e mós purvolta seis meses,” Koordenadór Aurélio Guterres ba Agênsia TATOLI, Avenida Portugal (antiga Praia dos Coqueiros-red), Dili, ohin.

Kona-ba klaster língua nian, nia haktuir, nia parte fahe ba língua Portugeza no Língua Ingleza.

“Língua ingleza fahe ba nível enjerál nível tolu; nível ida nível jerál inglés nian, intermédiu no inglés espesifikamente ba oinsá mak ita ko’alia inglés diplomasia nian ou hakerek inglés diplomasia nian, hanesan mós ho lingua portugeza,” nia dehan.

Agora daudaun, nia haktuir, sei iha prosesu hela atu institute prepara nia kuadru legál ba kestaun kurríkulu ba formasaun sira ne’e hanesan kurríkulu diplomasia, kurríkulu língua no seluk tan.

Nune’e, nia reforsa, espera katak, aban bainrua tinan ida, tinan rua, ita bele estabele lalais, atu nune’e públiku mós bele tuir kursu sira iha IED, la’ós de’it iha MNEK.

Kurrikulu ba estudu diplómatiku, nia esplika, maioria liga ho Ekonomia Politíka, Istória, Kuadru legál, Relasaun internasionál, oinsá atu halo komunikasaun no oinsá halo negosiasaun.

“Kurríkulu hanesan ita bele dehan katak, liga ho kestaun relasaun internasionál. Kurríkulu ne’e espesifikamente. Se ita hanesan partisipante sira ne’ebé hasai ona kursu iha politíka, direitu, ekonomia, istória, geografia, kuandu mai tuir kursu diplomátiku maibé espesifikamente iha área diplomasia,” nia hateten.

Ninia rekezitu, nia esplika, antes atu tuir fotmasaun sira ne’e presiza tuir kursu inglés ba diplomasia ka portugés ba diplomasia tanba formadór sira ne’e la’ós timoroan de’it, normalmente profesór sira mai husi Universitáriu sira husi rai li’ur (Malázia, Singapura, Indonezia, Filipina, Austrália , Portugal),

Nia esplika, MNEK foin prepara formasaun ba diplomata sira liliu ba embaixadór sira tanba embaixadór hotu-hotu obrigatóriu tenke tuir formasaun sira ne’ebé antes sira ba raí liur, sira tenke hatene Pólitika Estadu Timor-Leste oinsá, Polítika Dezenvolvimentu Nasionál oinsá, Prioridade ita-nia Estadu oinsá ba iha Raí liur.

Notísia relevante:IED Kontinua Koopera Ho Embaixada Canada Fó Formasaun Ba Diplomata Sira

Jornalista : Nelia Fernandes

Editór       : Rafy Belo

HAKEREK NO HATÁN

Please enter your comment!
Please enter your name here