Primeiru-Ministru, Taur Matan Ruak, Prezide Reuniaun Konsellu Ministru iha Palásiu Governu, kuarta (19/02). Imajen Tatoli/Egas Cristovão

DILI, 05 fevereiru 2020 (TATOLI)  –  Governu liuhosi reuniaun Konsellu Ministru iha kuarta ne’e, aprova Proposta Dekretu-Lei ne’ebé mai ho aprovasaun ba alterasaun daneen Dekretu-Lei Númeru 15/2008, loron 4 juñu, aprezenta husi  Ministru Asuntu Kombatente Libertasaun Nasionál ein ezersísiu, Gil da Costa Monteiro ‘Oan Soru’, kona-ba regulamentu  pensaun kombatente no mártir libertasaun nasionál sira.

Ministru Estadu Prezidénsia Konsellu Ministru, Hermenegildo Augusto Cabral Pereira, informa montante osan ne’ebé ko’a sei destina ba konta bankária Konsellu Kombatente Libertasaun Nasionál.

“Alterasaun ne’e permite Ministériu Finansa bainhira halo pagamentu pensaun, halo retensaun mós ba osan balun maibé halo de’it ba membru kombatente libertasaun nasionál ne’ebé hatan pur eskritu katak konkorda liuhosi Konsellu Kombatente Libertasaun Nasionál”, tenik governante ne’e iha Palásiu Governu, Kuarta ne’e.

Antes ne’e, atuál Sekretáriu Estadu Asuntu Kombatente Libertasaun Nasionál, Gil da Costa Monteiro ‘Oan Soru’, klarifikasaun kona-ba pensaun veteranu ne’ebé hahú janeiru 2020 ko’a $30 kada fulan tanba atu rai iha fundu no prepara polítika ba kombatente sira nia futuru.

Antes ko’a iha ona konsultasaun kle’an to’o aprova deliberasaun númeru 1 iha kongresu dahuluk Konsellu Nasionál Kombatente no Libertasaun Nasionál iha loron 21 dezembru 2019, hodi fó kbiit ba Sekretaria Estadu Antigu Kombatente Libertasaun Nasionál hodi hahú implementa polítika kriasaun fundu investimentu ba veteranu.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here