Sekretáriu Estadu ba Protesaun Sivíl, Alexandrino de Araújo. Imajen/António Gonçalves

DILI, 05 fevereiru 2020 (TATOLI)-Sekretária Estadu Protesaun Sivíl (SEPS) finaliza ona elaborasaun ezbosu lei baze protesaun sivíl hodi hein aprezenta ba Konsellu Ministru (KM) atu diskute no aprova.

Sekretáriu Estadu Protesaun Sivíl, Alexandrino Xavier Araújo, hateten, ezbosu lei ne’e ho nia artigu hamutuk 67 sei sai hanesan matadalan atu hala’o dezenvolvimentu area protesaun sivíl iha futuru di’ak liu tan. Nune’e mós  sei define loloos servisu protesaun sivíl hodi kontrola servisu operasionál emerjénsia sira.

SEPS mós realiza konferénsia internasionál hodi konvida peritu husi Austrália, Portugál, Indonézia ho akadémiku no sosiedade sivíl, kona-ba enkuadramentu legál iha protesaun sivíl, hodi nune’e, bele hetan experiénsia elabora ezbosu ho kualidade.

“Lei baze ne’e finaliza ona, ami nia parte submete ona ba iha gabinete tutela Ministériu Interior iha fulan setembru 2019, hodi hein sira aprezenta ba iha Konsellu Ministru atu hola desizaun,” hateten Sekretáriu Estadu Alexandrino de Araújo, ohin, ba Ajénsia TATOLI iha nia kna’ar fatin, Caicoli, Dili.

Governante ne’e espera, iha mandadu governasaun da-ualu ministériu tutela bele lori ona ezbosu lei ne’e hodi ba aprezenta iha Konsellu Ministru hola desizaun.

Jornalista   : Nelson de Sousa

Editór       : Francisco Simões

HAKEREK NO HATÁN

Please enter your comment!
Please enter your name here