Embaixadór Austrália iha Timor-Leste, Peter Llewilyn Roberts. Imajen Tatoli/Cipriano Colo

DILI, 05 fevereiru 2020 (TATOLI)—Embaixadór Austrália mai Timor-Leste, Peter Roberts, hasoru malu ho Eis Primeiru-Ministru, Marí Alkatiri hodi diskute kona-ba kooperasaun bilaterál.

“Ha’u vizita kortézia mai iha ne’e ko’alia kona-ba relasaun bilaterál no oportunidade atu hametin kooperasaun ho Austrália”, Embaixadór Peter Robert, informa ba jornalista sira, hafoin hasoru-malu ho Marí Alkatiri, iha rezidénsia Eis Titulár, Farol, Dili, kuarta ne’e.

Embaixadór Austrália ne’e mós lakohi fó informasaun kona-ba tipu kooperasaun ne’ebé ko’alia ho Marí Alkatiri.

“Ha’u labele ko’alia liután”, Embaixadór Austrália ne’e afirma ho liafuan badak.

Peter ho nia ekipa hasoru-malu ho Marí Alkatiri oras ida nia laran, hahú husi tuku 09.30 to’o tuku 10.00 otl.

Entretantu, Eis Primeiru-Ministru, Marí Alkatiri mós lakohi komenta kona-ba soru-mutuk ne’e.

“Jornalista sira, ha’u la ko’alia”, Marí Alkatiri haklaken.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here