Diretór Ezekutivu CEPAD, João Boavida. Imajen Tatoli/Egas Cristóvão

DILI, 05 fevereiru 2020 (TATOLI)–Bazeia ba estudu husi Sentru Estudu ba Pás no Dezenvolvimentu (CEPAD-sigla portugés) katak Timor-Leste (TL) oras ne’e daudaun moris hela iha situasaun pás negativa. 

Diretór Ezekutivu CEPAD, João Boavida fó-sai asuntu ne’e, hafoin hasoru-malu ho Prezidente Repúblika, Francisco Guterres Lú Olo, iha Palásiu Prezidente Nicolau Lobato, Bairru Pité, Dili, ohin.

“Ko’alia kona-ba pás, ita halai liubá pás negativa ne’ebé maka agora ita moris hela iha situasaun Timor. Pás negativa atu dehan de’it katak kilat la tarutu no kilat musan la semo”, Boavida esplika.

Nia mós esplika kona-ba pás pozitivu atu dehan katak iha justisa sosiál, ema hotu moris hanesan iha lei nia okos no sidadaun hotu hakarak atu iha oportunidade hanesan.

Ho situasaun sira ne’ebé ohin loron Timor-Leste enfrenta, CEPAD hato’o ninia apresiasaun boot tebes ba Prezidente Repúblika katak apezár povu moris iha situasaun ida-ne’ebé krítika, impase polítika, maibé Prezidente Repúblika konsege lori prosesu governativu ho ninia orientasaun rasik, ho nia autoridade, ho nia pasiénsia, kapasidade, ho nia determinasaun, defaktu katak lori naha ne’e todan, maibé Xefe Estadu konsege lori to’o ohin loron asegura situasaun ida-ne’ebé hakmatek, di’ak.

Nia mós fiar katak líder nasionál sira sei hasoru-malu atu diskute hodi buka solusaun ba situasaun ne’ebé povu tomak hasán hela.

“Kona-ba konesaun ba malu, ha’u hanoin ita moris iha rai ki’ik, susar uitoan atu sees malu. Tanba ita haree katak, kona-ba polítika, defaktu sira presiza tuur hamutuk hodi rona ideia ne’ebé la hanesan. Dalan ida maka oras ne’e daudaun Prezidente Repúblika halo esforsu atu rona sira, no ha’u fiar katak sira sei mai. Hanesan ita akompaña katak diálogu ne’ebé Xefe Estadu konvoka, líder partidu polítiku sira mai ona, Bispu na’in-tolu no ema hotu mai ona hasoru-malu no ha’u hein katak sira (líder istóriku) sei mai. Importante ba ita maka prosesu ne’e bainhira ita iha hanoin di’ak ruma, fó ba atubele hetan solusaun”, nia subliña tan.

Entretantu, CEPAD estabelese iha tinan 2007 ho nia objetivu atu serbisu hodi halo kontrolu ba sosiedade Timor-Leste, fó hanoin ba Governu liuhusi sosiedade nia lian.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here