Diretór Ezekutivu CEPAD, João Boavida. Imajen Tatoli/Tatoli Egas Cristóvão

DILI, 05 fevereiru 2020 (TATOLI)–Diretór Ezekutivu Sentru Estudu ba Pás no Dezenvolvimentu (CEPAD-sigla portugés), João Boavida konsidera timoroan hotu alérjiku ho Eleisaun Antesipada (EA). 

Tanba ne’e, diálogu ne’ebé konvoka husi Prezidente Repúblika (PR), Francisco Guterres Lú Olo, Boavida fiar katak sei bele hetan alternativa di’akliu atu rezolve impase polítika ne’ebé iha.

“Bainhira ita temi kona-ba Eleisaun Antesipada (EA), ita hotu alérjiku. Tanba ne’e, ha’u fiar katak nai-ulun no governanante sira, líder partidu polítiku sira no ita hotu lakohi atu enfrenta tan Eleisaun Antesipada. Ne’e duni, ha’u hanoin ita hakarak habarani ita-nia ukun-na’in sira, atu tuur hamutuk, rona malu, nune’e ho orientasaun husi Prezidente Repúblika bele hetan alternativa seluk di’ak liután Eleisaun Antesipada, tanba EA ninia kustu ne’e boot liubá Estadu no ba povu. Ita hotu tenke prevene ida-ne’e”, Boavida ko’alia asuntu ne’e ba mídia, hafoin hasoru-malu ho Prezidente Repúblika, iha Palásiu Prezidente Nicolau Lobato, Bairru Pité, Dili, ohin.

Nia esplika katak CEPAD simu konvite husi Prezidénsia Repúblika atubele dadalia uitoan ho Prezidente Repúblika, Francisco Guterres Lú Olo, kona-ba situasaun ne’ebé povu no nasaun Timor-Leste enfrenta ohin loron.

Boavida hatutan, konvite ne’e prezidénsia fó tanba serbisu ne’ebé CEPAD halo iha tinan rua-nulu resin liubá, iha diálogu permanente, harii dame no kontribui ba harii Estadu hodi hametin pás.

“Opiniaun CEPAD nian kona-ba situasaun atuál,  ‘de facto’ ami halai liubá oinsá hamenus todan ne’ebé agora iha, liuliu Prezidente Repúblika ho sidadaun hotu lori, bainhira enfrenta krize ida-ne’e. Ho baze serbisu ne’ebé mak ita halo liuhusi CEPAD, ha’u hanoin situasaun atuál, ita la halo di’ak ba povu ida-ne’e” Boavida subliña.

Kona-ba pontu espesífiku ne’ebé CEPAD hato’o liuhusi pareser, João Boavida hateten ne’e kabe ba Prezidente Repúblika mak iha kompeténsia atu fó-sai, bainhira rona ona ema hotu-hotu nia hanoin.

“Tanba ne’e, saida de’it mak Prezidente Repúblika deside, sei bele hetan solusaun di’ak ida, hamenus tiha todan ne’e liuhusi formasaun Governu ne’ebé mosu, no hein katak liuhusi konsultasaun ida-ne’e, Governu mós labele todan, labele mahar, labele bokar, nune’e hatán de’it ba prosesu tinan rua nian ba eleisaun jerál 2023, ho kualidade, ho konsentrasaun, atubele lori ita sai husi situasaun krítika” nia hakotu.

Iha soru-mutuk ho Prezidente Repúblika, Diretór Ezekutivu CEPAD akompañadu husi Vise Xefe Estadu Maiór Jenerál FALINTIL-Forsa Defeza Timor-Leste (F-FDTL), Brigadeiru Jenerál Falur Rate Laek.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here