Prezidente ANPM sesante, Gualdino do Carmo da Silva. Imajen Tatoli/António Gonçalves

DILI, 05 fevereiru 2020 (TATOLI) – Prezidente Autoridade Nasionál Petróleu no Minerál (ANMP), Gualdino da Silva, informa simu ona kontaktu husi kompañia nasionál no internasionál 10-resin ne’ebé hatudu interese ba konkursu públiku bloku 18 mina no gás ne’ebé lansa ona husi Primeiru-Ministru, Taur Matan Ruak, iha outubru 2019.

“Ita iha kompañia rai-laran no li’ur, ita bele dehan mais 10 kontaktu ona no hatudu nia interese ba konkursu publiku ba bloku 18 mina no gás ne’e no ita fahe ona informasaun ba sira”, Prezidente ANPM afirma hafoin partilla informasaun ba embaixadór foun na’in-hitu iha edifísiu Ministériu Finansa, Aitarak-Laran, tersa ne’e.

Empreza lubuk ida mak kontaktu ona, maibé iha abríl ba leten ne’e mak bele hatene no hahú prosesu pre-kualifikasaun atubele loke ba konkursu públiku.

“Tanba ne’e mak ita kontinua la’o hodi halo promosaun atubele atrai investidór sira”, katak.

Hodi dehan daudaun ne’e, ekipa ANPM ka Estadu Timor-Leste iha hela estranjeiru hodi kontinua promove konkursu públiku ba bloku 18 ne’e.

“Iha hela estranjeiru liuliu Estadu Unidu Amérika hala’o atividade promosaun ida no marsu sei kontinua nafatin iha Austrália no Singapura”, dehan.

Timor-Leste mós halo ona abertura konferénsia internasionál ba Petróleu no Gás ho objetivu atu promove no buka rede inklui loke odamatan ba investidór sira ba iha atividade petrolifera.

Estadu Timor-Leste liuhosi Primeiru-Ministru iha simeira internasionál iha outubru 2019, lansa ona konkursu públiku daruak ba mina no gás bloku 18, kompostu husi 11 iha tasi-laran no hitu iha rai-maran.

Notísia relevante : Timor-Leste Lansa Konkursu Públiku ba Bloku Foun 18

Jornalista : Florencio Miranda Ximenes
Editora : Maria Auxiliadora

HAKEREK NO HATÁN

Please enter your comment!
Please enter your name here