Turista sira Ne’ebé mai ho Ró Pacific Explore bainhira to’o iha Ponte Kais Dili, Timor-Leste, 5 fevereiru 2020.Imajen/António Gonçalves.

DILI, 05 fevereiru 2020 (TATOLI) – Negosiante Tais, Maria Lopes, hatete turista sira ne’ebé mai ho kruzeiru P&O Pacific Explore, ohin, fó benefísiu ekonómiku ba sira.

“Sira (turista) mai haree duni ami-nia artezanatu sira ne’e no balun sosa no balun mai haree de’it ne’ebé ami konta ba hanesan ami hetan netik benefísiu husi ró mai ne’e”, Vendedóra ne’e dehan ba Ajénsia TATOLI iha Sentru Informasaun Turístika, Licidere, ohin.

Negosiante Maria Lopes kompara iha tinan kotuk vizita ró ladún hetan retornu, maibé, ohin, iha rendimentu uitoan hodi bele sustenta netik uma laran. “Ami kontente ho vizita ró ne’ebé tula turista sira barak mai ne’e”, dehan nia ho kontente.

Kondutór Bís Lorico, Manuel Freitas Gusmão, mós kontente ho kruzeiru ne’e tanba ajénsia Concierge Confiavel Timor aluga bís loron ida tomak ho folin $150.

“Ami tula sira bá fatin turístiku sira hanesan Cristo Rei, Muzeu, Sentru CHEGA, ne’ebé kontente tanba ladún kolen hanesan tula pasajeiru Dili bá Baucau”, katak.

Diretór Concierge Confiavel Timor, Ricki Evaresto Agon Pinto, mós satisfeitu tanba benefísiu ne’ebé sira hetan husi vizita kruzeiru Pacific Explore ne’e bele fahe mós ba transporte públiku no privadu sira liuhosi aluga karreta.

“Ami aluga bís 10, mini bus husi kompañia EDS 15 no karreta privadu 5 ho folin mínimu $150 no to’o lokraik enxe nia mina to’o nakonu”, adianta.

Hodi dehan vizita turista na’in-2.072 ne’e fó mós benefísiu ba ajénsia, mas importante liu mak promove Timor-Leste ba mundu.

Ajénsia Concierge Confiavel Timor fa’an pakote haat ba kruzeiru Pacific Explore hanesan, dahuluk, pakote On Hop off tula turista iha Dili laran de’it, daruak, High Land Coffe Explore ne’e turista sira vizita Ermera hodi akompaña prosesu ku’u kafé to’o prosesa iha fábrika, datoluk, Dili Highlight mós turista sira iha Dili laran de’it liuliu vizita sítiu turístika ne’ebé besik, dahaat, East Timor Explore atu turista sira bá iha Dolok Oan hodi refreshing no haree natureza tasi iha área ne’e.

“Ami-nia pakote ne’e fa’an ba turista sira no depende sira hakarak hola ida ne’ebé, mas folin másimu husi pakote haat ne’e mak dólar Austrália 100”, afirma.

Diretór Jerál Turizmu, José Filipe Dias Quintas, hatete vizita kruzeiru Pacific Explore ho rute husi illa Bali-Indonézia ho pasajeiru 2.945, ho totál turista 2.072 no tripulante 873 ne’ebé maioria sidadaun Austrália no timoroan 30.

“Vizita ne’e fó benefísiu ekonómiku ba negosiante no transporte públiku sira”.

Nia dehan kruzeiru ne’e mós iha timoroan ne’ebé kleur iha Austrália pur volta 30, sira mós iha ró nia laran hodi haree fatin turístika ne’ebé besik iha Dili, Ermera no Liquiçá.

Nune’e, José Quintas agradese ba liña ministeriál sira no ajénsia ne’ebé apoia organiza hodi simu kruzeiru ne’e ho susesu tebes.

“Ita hamutuk atu kontinua promove imajen Timor-Leste nian ba mundu nu’udar destinasaun turístika ne’ebé di’ak no seguru”, dehan.

Hodi hatete populasaun Timor-Leste hatudu ona ba mundu katak Timor-Leste iha pás nia laran no hakarak promove Timor-Leste ba internasionál.

“Ita presiza mellora atendimentu no infraestrutura atu atrai turista sira mai Timor-Leste hodi promove sítiu turístiku”, hakotu.

Kruzeiru Pacific Explore ne’e husi rute Illa Bali-Indonézia atu bá Darwin- Austrália, to’o iha Dili tuku 7:00 dadeer no kontinua nia viajen iha 15:45 loraik bá Austrália.

Notísia relevante : Aban, Turista 2.072 Vizita Timor-Leste ho Kruzeiru Pacific Explore

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here