Prezidente Repúblika, Francisco Guterres Lú Olo. Imajen Tatoli/António Gonçalves

DILI, 05 favereiru 2020 (TATOLI)–Hafoin rejeisaun Proposta Lei Orsamentu Jerál Estadu 2020, iha 17 janeiru tinan ida-ne’e, Prezidente Repúblika uza kbiit husi artigu 74 Konstituisaun RDTL, atu garante unidade Estadu no funsionamentu regulár instituisaun demokrátika.

Komunikadu ne’ebé fó-sai husi Prezidénsia Repúblika ne’ebé Agência Tatoli asesu, ohin, hateten ho kbiit ida-ne’e mak Prezidente Repúblika halo diálogu ho líder polítiku no entidade relevante sira tuir mai: Forum Organizasaun Sosiedade Sivíl oioin (FONGTIL), jurista, Igreja Katólika no konfisaun relijioza sira seluk, Câmara do Comércio e Indústria de Timor-Leste (CCI-TL), Conselho Combatentes da Libertação Nacional, organizasaun rezisténsia hamahon-an iha Konsellu Nasionál Juventude Timor-Leste, Centro de Estudo para a Paz e Desenvolvimento (CEPAD), Movimentu Asukai Lorosa’e no FORSAREPETIL husi 23 janeiru to’o 07 fevereiru 2020.

Hafoin rona tiha partidu polítiku, organizasaun no instituisaun, Prezidente Repúblika, Francisco Guterres Lú Olo, konvida no sei prezide enkontru ho líder istóriku no personalidade sira, iha 10 fevereiru 2020, hodi rona sira-nia hanoin kona-ba situasaun polítika-konstitusionál rai-laran.

Líder istóriku no personalidade sira ne’ebé Xefe Estadu konvida mak: Eis-Prezidente Repúblika, Eis-Primeiru-Ministru, Kay Rala Xanana Gusmão, Eis-Prezidente José Ramos Horta, Eis-Prezidente no atuál Primeiru-Ministru, Taur Matan Ruak, Eis- Primeiru Ministru Marí Alkatiri, Xefe Estadu Maiór-Jenerál F-FDTL, Majór-Jenerál Lere Anan Timur no veteranu Roque Rodrigues.

Hamutuk ho líder no personalidade hirak-ne’e, Xefe Estadu sei “halo análize no identifika opsaun sira ne’ebé di’akliu hodi hadi’a situasaun polítika-konstitusionál atuál”.

Ikusliu, Xefe Estadu mós sei rona no tetu hanoin sira hosi ninia órgaun konsulta–Konsellu Estadu, molok foti dezisaun relasiona ho situasaun polítika-konstitusionál ne’ebé oras ne’e nasaun hasoru.

Prezidente Repúblika kompromete atu nafatin hala’o diálogu hodi rona hanoin husi líder no sidadaun sira atu hotu-hotu hamutuk lori polítika dezenvolvimentu ba povu tomak nia bem-estar no justisa sosiál.

Ba povu no nasaun nia di’ak, Prezidente Repúblika sei halo esforsu hotu-hotu.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here