DILI, 04 fevereiru 2020 (TATOLI) – World Vision Timor-Leste parseria ho Ministériu Agrikultura no Peska (MAP) realiza eventu aprendizajen ida kona-ba Agrikultór Maneja Rejenerasaun Naturál (FMRN).
Diretora Nasionál World Vision Timor-Leste, Migena Shulla, hateten objetivu atu halibur autór prinsipál floresta, agrikultór no parseiru sira hodi bele hamutuk fahe hanoin kona-ba lisaun aprendizajen jestaun florestál no inovasaun foun ba iha métodu floresta, jestaun konservasaun bee, preparasaun uza rai ba futuru no atividade interesante sira seluk.
“Serbisu prinsipál World Vision nian maka fila liman (negósiu) hamutuk ho agrikultór sira hodi prodús ai-han ne’ebá nakonu ho nutrisaun di’ak para nune’e sira la’ós uza ba han de’it, maibé mós ba fa’an, hanesan ai-han hanesan fehuk-midar, marungi, koto-mean, no fore-mungu, ai-han sira ne’e ami bolu super nutrisaun. Maibé agora ho issue mudansa klimátika dala barak mós fó impaktu ba produsaun ai-han”, Migena Shulla afirma iha Salaun Sentru Juveníl Padre António Vieira, Taibessi, ohin.
Nune’e ho eventu ida ne’e, bolu parseiru sira agrikultór no Governu nian hodi fó hanoin saida maka atu halo hamutuk para bele koko nafatin mantén ai-han ne’ebé di’ak nune’e bele konsome ba loroloron.
Diretór Jerál Floresta MAP, Raimundo Mau, apresia ba World Vision ne’ebé organiza eventu ida ne’e halibur to’os-na’in hosi munisípiu sira no mós parseiru dezenvolvimentu sira hodi fahe informasaun prátika di’ak oinsá atu proteje hamutuk rekursu floresta.
“Ita-nia situasaun florestál ein jerál iha Timór iha tempu bailoro presaun ne’ebé makaas tebes maka ahi-han rai, entaun konserteza ahi-han hotu ai-horis ki’ikoan sira ne’ebé maka foin atu moris sa’e no han mós sira ne’ebé tuan ona entaun kondisaun ida ne’e kontinua degrada ita-nia rekursu ai-laran sira ne’e rasik, entaun halakon tiha nia funsaun no iha tempu udan nia abut labele absorve udan-been ho di’ak”, Raimundo Mau dehan.
Relasiona ho situasaun ne’e, Diretór Jerál Floresta apela ba komunidade, liuhusi autoridade lokál, estensionista, guarda florestál sira atu sidadaun hothotu, individualmente bele sai hanesan protetór ba floresta hodi nune’e floresta kontinua ejerse ninia funsaun hodi regula mikro klima, hodi proteje ba iha rai hodi domíniu erozaun atu nune’e dook hosi dezastre sira kauza hosi funsaun ai-laran lakon.
Partisipa iha eventu ne’e mai hosi agrikultór hosi munisípiu sira, ONG nasionál, reprezentante Governu.
Eventu ne’e hala’o durante loron rua iha tersa no remata iha kuarta ho vizita ba suku Fahiria, Munisípiu Aileu hodi hala’o estudu komparativu.
Jornalista : Antónia Gusmão
Editora : Maria Auxiliadora
