Xefe Laboratóriu Sentrál Pratika, Domingas Belo Amaral Mendes. Imajen: Tome Amado

DILI, 04 fevereiru 2020 (TATOLI) – Xefe Laboratóriu Sentrál Prátika 30 de Agosto, Domingas Belo Amaral Mendes hateten katak Sentru Estudu ba Siénsia no Matemátika (SESIM) planea sei instala tan Laboratóriu Sentrál Prátika (LSP) ba estudante ensinu sekundáriu besik iha área Eskola 4 Setembru UNAMET hodi fasilita liután estudante sira.

“Loos duni durante ne’e Laboratóriu Sentrál Prátika ne’ebé ita instala iha Comoro ninia distánsia do’ok demais tanba ne’e eskola barak mak ladun partisipa. Maibé ita iha ona planu atu instala mós iha sentru atu apoiu tan estudante sira husi área Becora nian”, Koordenadora Grupu SESIM ba feto ba Agência TATOLI iha edifísiu Ministériu Edukasaun, Juventude no Desportu (MEJD) Vila Verde, ohin.

Nia dehan, planu atu instala tan LSP ba Estudante Ensinu Sekundária Jerál Públiku no Privadu ne’e tanba LSP ne’ebé mak lokaliza iha eskola 30 de agostu Comoro ne’e ba estudante ensinu báziku terseiru siklu sira maibé LCP ne’e la taka dalan ba estudante ES sira atu asesu tanba fasilidade ne’e harii ba estudante hotu.

“Ita hanoin ona atu tau tan ida iha sentru besik Eskola Sekundária Jerál 4 Setembro ne’e hodi haketak ona partisipasaun entre estudante terseiro siklu ho sekundáriu sira”.

Tuir nia kuaze eskola sira iha kapital Dili ne’ebé hotuhotu hetan ona informasaun kona-ba LSP ne’e rasik no sira halo oráriu hodi ba vizita. Úniku Eskola ensinu sekundáriu Coracão de Jesus Becora, ESJ Hera, Dare no Ataúro mak nunka mai vizita razaun tanba distansia dook.

Entertantu, planu atu monta ka instala tan LSP ne’e mós foin mak iha planu espera katak buat hotu los ona tinan ida ne’e bele instala ona atu nune’e ejizénsia estudante sira nian bele responde tuir nesesidade.

Notísia relevante: https://www.youtube.com/watch?v=ilNAqHEP7tM&t=312s

Jornalista    : Tomé Amado

Editór          : Rafy Belo

HAKEREK NO HATÁN

Please enter your comment!
Please enter your name here