Prezidente Parlamentu Nasionál, Arão Noe de Jesus da Costa Amaral. Imajen /Egas Cristóvão

DILI, 04 fevereiru 2020 (TATOLI)—Prezidente Parlamentu Nasionál (PPN), Arão Noé de Jesus da Costa Amaral, husu ba públiku labele fiar buatu ne’ebé espalla kona-ba nia atu rezigna molok Prezidente-Repúblika foti desizaun ba inserteza polítika iha rai-laran.

Prezidente Parlamentu Nasionál ne’e lahatene sé maka fó-sai informasaun ne’e kona-ba nia atu rezigna-an ne’e.

To’o agora, nia parte seidauk foti desizaun ida kona-ba atu rezigna-an ne’e, tanba prosesu diálogu ne’ebé Prezidente Repúblika organiza sei la’o hela.

“Ha’u sei la foti desizaun ruma sein iha konjuntura polítika foun ida konstituidu. Tanba ha’u-nia rezignasaun iha impaktu boot ba funsionamentu Parlamentu Nasionál nian. Se seidauk iha aliansa ka koligasaun foun ida iha Parlamentu Nasionál hodi hili Prezidente Parlamentu foun maka sei iha impaktu ba funsionamentu órgaun ne’e nian”, Prezidente Parlamentu Nasionál, Arão Noé de Jesus da Costa Amaral, esklarese ba Agência TATOLI via email, tersa dadeersan ne’e.

Prezidente Parlamentu Nasionál ne’e husu ba públiku labele fiar boatu no kontinua akompaña prosesu diálogu ne’ebé Prezidente Repúblika halo hela.

Nia parte konsidera informasaun ne’ebé ema balun espalla iha rede sosiál hanesan espekulasaun.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here