DILI, 4 janeiru 2020 (TATOLI)–Responsavel Postu Saúde Maloa, Luiza da Costa hateten, Postu Saúde Maloa nia área kobertura ne’ebé boot to’o kobre aldeia 26 maibe daudaun ne’e kobre de’it ba aldeia 19 tanba rekursus umanus menus ho ema na’in nai’n 10 de’it.

“Ami-nia pesoál saúde ida toma konta aldeia ida. Ami-nia reskursu umanu menus tebes. Entaun, pessoal ida tenke kobre aldeia rua atu haree kazu ruma ne’ebé moras iha uma laran la mai konsulta iha Postu Saúde. Karik kazu ne’ebé boot, ami presiza halo transferensia ba ospitál nasionál,” dehan Responsavel Postu Saúde Maloa, Luiza da Costa, ba Ajénsia TATOLI iha nia kna’ar fatin, ohin.

Nia informa, durante ne’e Postu Saúde Maloa kobre de’it aldeia hamutuk 13 mak Aldeia Halimutin, Rai na’in, Tekiteki, 5 de outubru, Frecat, Niken, Fuslan, Ribeira Maloa, Rio de Janeiru, Avanca, Fatumeta, Wadalak, no Aldeia Haburas tanba sira bele asesu ho la’o ain.

Aldeia ne’ebé sira labele kobre, nia infroma, mak Aldeia Moris Ba Dame, Terus Nanis, Ruin Naklekar, Buka Fini, Timor Kmanek, TAT, Licarpoma, Camatama, no Aldeia Andivil tanba ba aldeia hirak ne’e presiza transporte hanesan mikrolet.

Ba aldeia hirak ne’e, nia haktuir, sira-nia parte husu tulun ba ba Sentru Saúde Comoro mak reforsa fali tanba sira iha transporte ho motor entaun pesoal sira ne’e bele kobre.

Tanba ne’e, nia husu ba ministériu kompetente liuliu ministériu saúde atu aumenta rekursu umanu no hamatan ba fasilidade  tanba Postu Saúde Maloa nia área kobertura boot no populasaun mós barak.

Difikuldade seluk, nia hatán, iha ne’e laboratóriu la iha entaun dalaruma pasiente balun atu hasai raan, nia parte tenke haruka ba iha sentru saúde no haruka ba iha ospitál nasionál.

Jornalista : Nelia Fernandes

Editór       : Rafy Belo

HAKEREK NO HATÁN

Please enter your comment!
Please enter your name here