Labarik na'in-rua haree hela ró kruzeiru PACIFIC DAWN husi Austrália ne'ebé tula turista sira vizita Timor-Leste iha ámbitu komemorasaun aniversariu Loron Konsulta Populár ba dala-20 (referendu iha 30 Agostu 1999-30 Agostu 2019. Imajen/TATOLI.

DILI, 04 fevereiru 2020 (TATOLI) – Diretór Jerál Turizmu Ministériu Turizmu, Komérsiu no Indústria (MTKI), José Filipe Dias Quintas, informa turista kruzeiru atu kontinua vizita sítiu turístika sira hodi promove Timor-Leste nia naran ba mundu, nia xave importante mak mellora atendimentu no infraestrutura turístika sira.

“Importante liu Governu tenke halo investimentu barak liuliu ba mellora infraestrutura turístika, rekursu umanu no konetividade tanba ita iha difikuldade boot iha dezenvolvimentu turizmu”, Quintas dehan ba Ajénsia TATOLI iha Sentru Konvensaun Dili, ohin.

Nia afirma iha tinan ne’e, loke ho kruzeiru Pacific Explore ne’ebé ho turista 2.072, maibé iha tinan kotuk (2019) kruzeiru neen mak mai vizita Timor-Leste, kompara iha 2018, kruzeiru mai dala haat.

“Ita haree gráfiku sa’e ne’e sinál di’ak tanba sira haree destinasaun turístika sira iha Timor-Leste di’ak ba produtu ró kruzeiru nian”, katak.

Hodi dehan mellora infraestrutura hahú husi modernizasaun Portu Dili atubele apropriadu ba atraka kruzeiru sira tanba lokaliza únika iha sidade no asesu ba sítiu turístiku sira ne’e besik hanesan Monumentu 12 de Novembru, Museum Rezisténsia, Sentru CHEGA no Kristu Rei inklui sítiu sira seluk ne’ebé fó vantajen ba produtu turizmu kruzeiru.

“Ita haree turizmu kruzeiru ne’e fó benefísiu makaas tebes iha setór ekonomia ba povu, liuliu ita-nia taksista sira, artezanatu inklui kontribuisaun taxa liga ba vistu inklui ró atraka iha tasi mós selu”, adianta.

Hodi hatete presiza mellora mós portu iha munisípiu sira atu ró kruzeiru sira mai labele konsentra de’it iha Dili, mas tenke bá mós munisípiu atubele haree fatin turístika sira liuliu fatin istóriku sira iha munisípiu no ekonomikamente benefisia mós populasaun.

“Vizita kruzeiru ne’e depende tanba mekanizmu ne’e ami serbisu hamutuk ho ajénsia ró ka tratadu (handle) husi ajénsia Shipping Lai-Ara informa ba MTKI hodi konvida liña ministeriál atu organiza halo atendimentu di’ak liuliu asegura pasajeiru ró”, katak.

José Quintas informa tan bazeia ba informasaun, kruzeiru sei mai tan iha maiu 2020, ne’ebé hein katak vizita aban kruzeiru Pacific Explore ne’e la’o ho susesu.

“Ita fiar katak ró sira ne’e sei mai barak liu, maibé atendimentu ró tama mak ladi’ak, ita sei lakon oportunidade tanba sira bá fatin seluk”, hakotu.

Notísia relevante : Antesipa Virus Corona, MTKI Koordena MS Observa Pasajeiru Ró Pacific Explore

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here