Ministru Obra Públika, Salvador Soares dos Reis Pires. Imajen/Tatoli Egas Cristovão.

DILI, 04 fevereiru 2020 (TATOLI)—Ministru Obra Públika, Salvador Soares dos Reis Pires, hateten udan boot halo inundasaun iha kapitál Dili tanba kauza husi naturál no sosiál.

Ministru Obra Públika ko’alia asuntu ne’e relasiona ho inundasaun iha kapitál Dili ne’ebé hamate ona estudante ida iha área Audian, Dili, foin lalais ne’e.

Inundasaun ne’ebé halo estudante ida lakon vida no sidade Dili nakonu ho inundasaun, lori Bankada Parlamentár FRETILIN hatama rekerimentu ida ba meza Parlamentu Nasonál nune’e konvida Ministru Obra Públika debate urjénsia ho deputadu sira iha Parlamentu Nasionál.

“Ha’u hakarak komesa debate ne’e ho estudu Institutu Petróleu no Jeolojia (IPG-sigla portugés) ne’ebé mak depois inundasaun sira halo análize ba kauza ba inundasaun iha Dili ne’ebé fó-sai iha 28 janeiru. Sira hatene katak kauza prinsipál inundasaun iha sidade Dili mak kauza rua–kauza naturál no kauza sosiál”, Ministru Salvador Pires dehan bainhira hala’o debate urjénsia iha Parlamentu Nasionál, tersa ne’e.

Ministru Obra Públika ne’e esplika kauza naturál hanesan intensidade udan-been ne’ebé liu milimetru 116 kada loron bazeia ba Diresaun Nasionál Meteorolojia no Jeofízika iha dadus 2019 nian, tanba udan mai kle’ur iha oras ida nia laran.

Nia hatutan, haree hosi tinan 2004 UN Habitat mai halo programa no serbisu iha governasaun dahuluk halo estudu kona-ba planu urbanu, iha ne’ebá udan-been monu rai ho milimetru 500 kada tinan. Hafoin 2015 Seld of Life halo projetu agrikultura liuhosi peskiza ba bee no udan-been sa’e tiha ba milimetru 800 to’o milimetru 1000.

“Ida-ne’e atu hateten de’it katak mudansa klimátika tuir dadus ne’ebé IPG fó no dadus sira seluk hanesan referénsia ba ita”, nia katak.

Kauza sosiál mak hanesan asentimentu industriál ne’ebé konsiste barak liu ho pabimentasaun ne’ebé hamenus kualidade infiltrasaun udan-been ba rai-okos halo velosidade bee aumenta halo drainajen sira la sufisiente atu evakua udan-been ba iha tasi.

Nune’e mós impaktu sosiál umanu nian hanesan komunidade harii uma blokeia bee-dalan no mota nia sulin, soe fo’er arbiru.

“Iha ita-nia mota no kanál drainajen sira nia luan la sufisiente para kompensa kuantidade bee no udan-been ba área ne’ebé baixa liu atu prevene inundasaun”, nia esplika.

Ministru Obra Públika ne’e argumenta, iha tinan 2004 uma-kain iha sidade Dili hamutuk 32000, sensu 2015 sa’e ba uma-kain 45000.

“Entaun, ne’e hateten katak densidade abitasaun aumenta kada tinan. Se problema sira ohin la rezolve entaun risku ba inundasaun. Saida mak ami halo, iha 2018 no 2019 iha akontesimentu inundasaun ami kontrata kompañia rua prevene inundasaun. Primeiru, asaun mak ita kontrata kompañia ida ba halo perfurasaun iha pontu 15 iha área Caicoli, Manleuana, Maloa, Mascarenhas, Comoro, Lahane, Ai-mutin”, Salvador informa.

Aleinde ne’e, Governu kontrata kompañia Liliana hala’o limpeza ba lixu iha sidade Dili hodi prevene inundasaun.

Iha debate karáter urjénsia ne’e akompaña hosi Vise-Ministru Obra Públika, Nicolau Lino Freitas, Vise-Ministra Solidariedade Sosiál, Sekretáriu Estadu Protesaun Sivíl, Alexandrino de Araújo no Sekretáriu Estadu Meiu Ambiente, Demétrio Amaral.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here