Inspetór Jerál Traballu (IJT), Rofino Lopes dos Reis. Imajen Tatoli/Antónia Gusmão.

DILI, 04 fevereiru 2020 (TATOLI) – Inspesaun Jerál Traballu Sekretáriu Estadu Formasaun Profisionál no Empregu (SEFOPE, sigla portugés), iha 2019, kontribui reseita ba Estadu hamutuk $406.272.

“Ita aplika multa, tuir lei, artigu 77 atribui ba Inspesaun Jerál Traballu, ita aplika ona iha 2019 ba ema ne’ebé halo infrasaun, daudaun ne’e selu ona multa hamutuk $406.272”, Inspetór Jerál Traballu, Rofino Lopes dos Reis, ba Ajénsia TATOLI, Caicoli, ohin.

Nia realsa katak tuir loloos, multa ne’ebé aplika iha 2019 hamutuk $537.650, maibé selu de’it $406.272, entaun restu sei iha $100-resin, maibé sei selu iha 2020.

Kazu ne’ebé rejistu iha IJT hamutuk 923, maka infrasaun vistu ka serbisu ne’ebé laiha autorizasaun ho totál 694, violasaun seguransa saúde hamutuk 56 kazu, kontra traballu iha 99, kazu saláriu traballadór iha ualu no seluk tan hamutuk 66.

Nia esplika maioria empreza internasionál sira maka halo infrasaun hanesan Xina, Indonézia no Filipina.

Infrasaun hirak ne’e mosu tanba empreza internasionál sira hakarak serbisu lais kona-ba halo estrada no ponte inklui Portu Tibar, nune’e sira haruka traballadór sira mai hosi li’ur hodi halo serbisu hafoin prosesa sira-nia dokumentu.

Maibé iha artigu 77, kona-ba lei traballu hateten katak kualkér ema estranjeiru mai halo atividade profisionál tenke iha autorizasaun uluk hafoin halo serbisu, entaun hirak ne’e viola lei no IJT fó multa ba sira.

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here