Embaixadór Kanadá iha Timor-Leste, Cameron MacKay, akompaña ho ninia delegasaun, dada lia ho mídia sira iha Palásiu Governu, tersa (04/02). Imajen/Julia Chatarina

DILI, 04 fevereiru 2020 (TATOLI) – Embaixadór Kanadá iha Timor-Leste, Cameron MacKay ho ninia delegasaun hasoru malu ho Primeiru-Ministru (PM), Taur Matan Ruak hodi ko’alia kona-ba kooperasaun entre nasaun rua iha área ekonomia.

“Ami ko’alia kona-ba relasaun entre ema ho ema, kooperasaun iha área ekonomia entre Kanadá no Governu Timor-Leste, sistema dezenvolvimentu Kanadá, no ami mós ko’alia oituan kona-ba kooperasaun ho Organizasaun Nasaun Unida (ONU)”, dehan Cameron hafoin hasoru malu ho Xefe Governu iha Palásiu Governu, tersa ne’e.

Nune’e, diplomata ne’e iha esperansa kooperasaun ne’ebé iha ona entre nasaun rua bele kontinua nafatin.

Nia salienta, Kanadá hakarak suporta Timor-Leste tama iha organizasaun mundial komérsiu.

Biban ne’e, nia haktuir, Kanadá antes ne’e iha misaun importante iha Timor-Leste desde estabelese forsa ONU hodi suporta independénsia Timor-Leste.

Nune’e mós, Kanadá halo advokasia durante luta independénsia Timor-Leste.

“Ita iha kolaborasaun sistema no programa dezenvolvimentu iha tinan 20 liubá no kontinua to’o agora”, nia akresenta.

Cameron mensiona, bainhira Kanadá envolve iha istória independénsia Timor-Leste no nasaun ne’e simu refujiadu timoroan sira, balun daudaun ne’e hetan ona rezidénsia permanente Kanadá no balun fila hikas ona ba Timor-Leste.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here