Prezidente CNJTL, María Dadi Magno akompañadu husi ezekutivu no Konsellu Permanente CNJTL, ko'alia ba mídia hafoin hasoru-malu ho Prezidente Repúblika, Francisco Guterres Lú Olo, iha Palásiu Prezidente Nicolau Lobato, Bairru Pité, Dili. Imajen Mídia PR

DILI, 04 fevereiru 2020 (TATOLI)–Conselho Nacional Juventude Timor-Leste (CNJTL), sujere ba líder nasionál sira atu iha tinan 2023 sees ona husi partidu polítiku (ParPol) hodi sai hanesan aman ida, konsentra hadi’a Estadu ida-ne’e. 

Prezidente CNJTL, Maria Dadi Soares Magno husu ne’e, refere liubá líder nasionál sira hanesan Kay Rala Xanana Gusmão, Marí Alkatiri, Taur Matan Ruak, Ramos Horta no Lere Anan Timur.

“Ideál liu nu’udár mensajen husi CNJTL husu ba líder nasionál sira hanesan Kay Rala Xanana Gusmão, Marí Alkatiri, Taur Matan Ruak, Ramos Horta, Lere Anan Timur, hanesan fugura nasionál, líder nasionál, figura sentrál, se bele tinan 2023 ba leten, sees ona husi partidu maibé sai hanesan aman ida atu fó solusaun ba Estadu ida-ne’e. Ha’u hanoin tempu to’o ona, tanba la’ós de’it CNRT maka idola Kay Rala Xanana Gusmão, la’ós de’it FRETILIN maka idola Marí Alkatiri, la’ós de’it PLP maka idola Taur Matan Ruak, maibé sira-ne’e hanesan figura sentrál no nasionál”, María Dadi Magno hato’o asuntu ne’e ba mídia, hafoin lidera ezekutivu no kompozisaun Konsellu Permanente CNJTL hasoru-malu ho Prezidente Repúblika, iha Palásiu Prezidente Nicolau Lobato, Bairru Pité, Dili, ohin.

Dadi Magno mós konsidera Timor-Leste sei hakat liu situasaun polítika atuál, no husu ba entidade hotu atu tau konfiansa iha Prezidente Repúblika, Francisco Guterres Lú Olo.

“Dalan ida atu hakat liu impase ne’e maka Prezidente Repúblika hola inisiativa hodi realiza diálogu atu rona opiniaun husi entidade hotu, hanesan Konsellu Estadu, partidu polítiku sira, veteranu sira, bispu sira, konfisaun relijioza sira inklui ohin rona mós husi CNJTL. CNJTL absolutamente fiar katak ho diálogu ne’ebé Prezidente Repúblika konvoka, sei rezolve no sei hetan solusaun ba nasaun liuliu ba povu”, nia fiar.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here