Prezidente CNJTL, María Dadi Magno akompañadu husi ezekutivu no Konsellu Permanente CNJTL, ko'alia ba mídia hafoin hasoru-malu ho Prezidente Repúblika, Francisco Guterres Lú Olo, iha Palásiu Prezidente Nicolau Lobato, Bairru Pité, Dili. Imajen Mídia PR

DILI, 04 fevereiru 2020 (TATOLI)–Conselho Nasional Juventude Timor-Leste (CNJTL) afirma nia pozisaun ba solusaun impase polítika atuál. Organizasaun refere hakarak formasaun Governu ida grande inkluzaun, lakohi Eleisaun Antesipada (EA). 

“Ita ko’alia kona-ba Eleisaun Antesipada, situasaun ne’e la’ós tempu ona, no la’os dalan ka solusaun ideál liu atu rezolve situasaun atuál. CNJTL analiza ninia efeitu ho nia risku katak Eleisaun Antesipada sai dalan ida mós, legalmente sim, maibé pozisaun CNJTL sei opta nafatin ba Governu grande inkluzaun”, Prezidente CNJTL, María Dadi Magno ba mídia, hafoin lidera ezekutivu no kompozisaun Konsellu Permanente CNJTL hasoru-malu ho Prezidente Repúblika iha Palásiu Prezidente Nicolau Lobato, Bairru Pité, Dili, ohin.

Dadi esplika razaun rejeita Eleisaun Antesipada tanba ninia rezultadu sei nafatin no sei laiha partidu ida maka sei manán maioria absoluta.

Aleinde ne’e, nia hatutan, Eleisaun Antesipada mós sei la fó solusaun ida, bainhira polítiku-na’in sira kontinua laiha konsisténsia atu hateke kona-ba objetivu Estadu.

“Ida-ne’e maka importante ne’ebé ami hato’o ba Prezidente Repúblika no hanesan organizasaun, la impoin ba desizaun Prezidente Repúblika nian. Hanesan organizasaun mós afirma nia pozisaun hodi fó apoiu tomak ba Prezidente Repúblika bainhira hola desizaun ba Estadu no nasaun nia moris di’ak”, Dadi subliña.

Tuir planu, iha tempu badak, CNJTL ho líder juventude rezisténsia sira, sei ba hasoru-malu ho líder partidu politiku sira, sei hasoru-malu mós ho órgaun soberania Estadu, ho líder  nasionál sira atu oinsá tuur hamutuk, tanba hakarak ka lakohi, haree husi perspetiva partidu polítiku, impase ne’ebé akontese, ne’e problema ki’ikoan maibé sira maka la tuur hamutuk atu halo komunikasaun ba malu.

CNJTL hakarak agradese ba konvite no boa vontade ne’ebé Prezidente Repúblika rasik hola inisiativa tuir artigu 74 Konstituisaun Repúblika Demokrátika Timor Leste (K-RDTL), iha ne’ebé define loloos Prezidente Repúblika ninia papél, liga ba defende unidade nasionál, liuliu ba nasaun no Estadu ida-ne’e.

Ho baze ida-nee mak CNJTL ho nia kompozisaun Konsellu Permanente no mós Konsellu Ezekutivu, respeita no fó hanoin atu responde ba diálogu, liga ho situasaun atuál.

CNJTL mós preokupa ho Orsamentu Jerál Estadu (OJE) 2020 ne’ebé xumba iha Parlamentu Nasionál ninia impaktu afeta direta ba situasaun polítika liuliu ba aspetu ekonomia kompostu husi setór públiku, privadu no kooperativa sira ne’ebé depende ba Orsamentu Estadu.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here