Prezidente ANPM, Gualdino da Silva, foto hamutuk ho embaixadór na'in-hitu hafoin partilla informasaun sobre administrasaun no atividade peskiza no esplorasaun ba mina no minerál. Imajen/Florencio Miranda Ximenes.

DILI, 04 janeiru 2020 (TATOLI) – Autoridade Nasionál Petróleu no Minerál (ANPM) partilla informasaun sobre atividade peskiza no esplorasaun ba rekursu petrolíferu no minerál ba embaixadór foun sira ne’ebé simu ona pose husi Prezidente Repúblika, Francisco Guterres Lú Olo, atu promove.

“Ohin, sesaun di’ak tanba atualiza informasaun ba asuntu hotu-hotu kona-ba administrasaun atividade peskiza no mós esplorasaun ba rekursu petrolíferu no minerál ba embaixadór na’in-hitu (na’in-rua la partisipa)”, Prezidente ANPM, Gualdino da Silva, afirma hafoin fahe informasaun ba embaixadór sira iha edifísiu Ministériu Finansa, ohin.

Prezidente ANPM dehan embaixadór na’in-hitu ne’e mós iha interse makaas rona informasaun hotu kona-ba prosesu administrativa petroliferu no minerál atubele promove iha nasaun sira dezignada ba.

“Ami mós foka uitoan kona-ba konkursu públiku daruak ba bloku 18 ne’ebé la’o hela no lansa husi Primeiru-Ministru Taur Matan Ruak iha outubru 2019″, katak.

Hodi dehan, daudaun ne’e konkursu públiku ne’e la’o namanas hela ne’ebé presiza mós embaixadór sira-nia ajuda atu habelar hodi atrai investidór sira.

“Atu sira habelar liután kona-ba ita-nia konkursu públiku ba bloku 18 ba mina no gás ba país ne’ebé sira reprezenta Estadu ba iha ne’ebá”, adianta.

Estadu Timor-Leste liuhosi Primeiru-Ministru (PM), Taur Matan Ruak, iha simeira internasionál iha outubru 2019, lansa ona konkursu públiku daruak ba mina no gás bloku 18, kompostu husi 11 iha tasi-laran no hitu iha rai-maran.

Embaixadora Timor-Leste ba Austrália, Inês Maria de Almeida, hatete ANPM partilla informasaun ba embaixadór sira atu bá iha ema nia nasaun bele promove Timor-Leste nian rikusoin liuliu petróleu no gás.

“Ami tenke bá promove saida mak ita iha ne’e hodi investidór sira mai investe, agora sira mai ka la mai depende ba ita-nia resposta iha ne’e importante mak ita halo promosaun”, afirma.

Nia dehan, ANPM husu atubele promove konkursu públiku ba mina no gás bloku 18 ne’ebé Timor-Leste lansa ona katak Estadu ne’e fó oportunidade ba investidor sira bele mai iha ne’e investe liuliu halo esplorasaun ba mina no gás.

“Ita hakarak atrai investidór sira mai hodi investe iha ita-nia rai, mas entermus servisu iha rai-laran mós presiza tebes atu atrai ema mai investe”, afirma.

Partisipa iha enkontru partilla prosesu administrasaun peskiza no esplorasaun mina no gás ne’e husi Hermenegildo Lopes embaixadór Timor-Leste ba Kambódia, Juvita Rodrigues Barreto Gonçalves ba Estadu Vatikanu ka Santa Sé, Abrão dos Santos ba Repúblika Populár Xina , Isabel Amaral Guterres ba Portugál, Maria Renata Caldas de Jesus ba Laos, Inês Maria de Almeida ba Austrália no Gil da Costa, embaixadór Timor-Leste ba Reinu Unidu no Irlanda Norte no la marka prezensa Embaixadora Timor-Leste ba Singapura, Maria Natália Guterres Viegas Carrascalão no llídio Ximenes da Costa ba Japaun.

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here