Komparadór sira sei trauma atu ba sosa roupa obralan iha Ai-mutin. Imajen/Osória Marques

DILI, 04 fevereiru 2020 (TATOLI)-Prezidente Autoridade Munisípiu Dili (ADM), Gaspar Soares, hateten nia parte iha ona planu sei muda sai negosiante faan roupa ujadu (Obralan) iha área Ai-mutin Comoro no eis Pasar Sengol Bidau Dili iha tempu badak.

Antes ne’e, nia esplika Munisípiu Dili hasai ona karta xamada atensaun ba negosiante obralan ai-mutin atu muda bá Merkadu Manleuana tanba durante ne’e hamosu engrafamentu.

Notísia Relevante :Negosiante Obralan Ai-mutin Sei Hamamuk Fatin

Enkuantu, Eis Pasar Sengol Bidau, tuir planu Munisípiu Dili sei harii fatin estasionamentu no jardím públiku.

“Ita indentifika ona fatin sira ne’ebé sei muda tan maka negosiante iha Aimutin no (eis) Pasar Sengol Bidau ita halo indentifikasaun para hadia sidade urbana bele muda halo jardín ou fatin estasionamentu depende ba pedidu,” informa Prezidente Autoridade Dili, Gaspar Soares ba Jornalista iha Kampung Alor Dili, ohin.

Notísia Relevante :Sobu Baraka Kampu Alor, Povu La Kontente ho Prezidente Autoridade

Iha parte seluk, Gaspar dehan, hahú fulan-fevereiru ba oin ekipa Jestaun Merkadu Munisipiu Dili sei halo kontrolu rutina ba negosiante sira ne’ebé okupa trotoár no dalan públiku hodi faan sasan, hanesan iha Rotunda Comoro, Delta II, Eis Merkadu Comoro hodi muda hotu ba Merkadu Manleuana.

Gaspar dehan, Merkadu Manleuana sei iha fatin mamuk hamutuk 200- resin ba negosiante atu faan modo, ikan no naan.

“Loos duni fatin 200 iha Merkadu Manleuna sei mamutuk, ita sei muda negosiante sira para ba okupa fatin ne’e,” nia hatete.

Jornalista : Eugénio Pereira

Editór : Francisco Simões

HAKEREK NO HATÁN

Please enter your comment!
Please enter your name here