Viveiru ai-oan iha Maubara. Imajen/Egas Cristovão.

DILI, 04 fevereiru 2020 (TATOLI) – Ministériu Agrikultura no Peska (MAP) liuhusi Diresaun Jerál Florestál distribui ona ai-oan hamutuk millaun ida, hosi totál ne’e, komunidade foti ona porsentu 50.

“Ho Orsamentu Jerál Estadu 2019 nian, ami prodús ai-oan hamutuk millaun ida hodi fahe, no hosi totál ne’e porsentu 50 komunidade sira maka foti”, Diretór Jerál Floresta, Raimundo Mau, ba TATOLI iha Salaun Sentru Juvenil Padre António Vieira, Taibessi, ohin.

Raimundo Mau hatutan ai-oan sira ne’e kompostu hosi ai-kameli, ai-teka, ai naa, saria no ai-fuan sira seluk, ne’ebé tau iha sentru viveiru boot iha Maubara no sentru viveiru apoia tolu hanesan iha Lautem, Viqueque no Betano, inklui viveiru komunitáriu 33 iha postu administrativu sira.

“Bainhira ami halo distribuisaun, ami iha lista, ne’ebé ami sei tun fali bá haree, maibé antes entrega ami fó asisténsia téknika oinsá atu kuda ai sira ne’ebé tenke kuda dook hosi bee-matan, depois fulan tolu to’o fulan neen ami-nia tékniku sira bá halo monitorizasaun hodi hatene tuir ninia kreximentu”, Raimundo dehan.

Tuir Diretór Jerál, tékniku halo akompañamentu to’o manutensaun ba tinan tolu, karik iha tinan hirak ne’e ai mate barak no orienta fali hodi foti filafali ai foun hodi kuda no to’o tinan tolu kuandu ai refere bele moris naturál ona.

“Ami-nia akompañamentu ba ai-oan sira ne’ebé ami distribui durante tinan nee, akompaña to’o ai moris aas metru rua”, katak.

Raimundo subliña Governu mós iha ona polítika atu fó prémiu ba to’os-na’in sira ne’ebé kuda ai barak.

Notísia relevante : MAP Apela Komunidade Hakbesik Bá Sentru Viveiru Hodi Foti Ai-oan

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here