Koordenadór Jerál Liga Juvenil Timor-Leste, Diogo Neto (klaran). Imajen Tatoli/Hortençio Sanchez

DILI, 04 janeiru 2020 (TATOLI)–Jogu Liga Juvenil U-16 ne’ebé organiza hosi Liga Futeból Amadora (LFA) no Federasaun Futeból Timor-Leste (FFTL) sei termina iha 8 fevereiru 2020 mai ne’e iha kampu FFTL, Bairro Formosa, Dili, iha ne’ebé ekipa rua kompostu SLB no Aitana FC maka sei taka jogu refere.

Jogu refere partisipa hosi klube ualu maka hanesan AD SLB Laulara, FIEL, Lalenok United FC, Académica FC, Aitana FC, AS Ponta Leste, Karketu FC no Boavista FC.

Bazeia ba tabela klasifikasaun hatudu ona katak SLB maka sei sai hanesan kampiaun dahuluk ba Liga ne’e, iha ne’ebé ekipa ne’e nia pontu nani dook tebes hosi klube sira seluk maski sei hela jogu ida kontra Aitana FC.

Koordenadór Jerál Liga Juvenil Timor-Leste, Diogo Neto hateten durante époka primeiru ne’e la’o kapa’as tebes tanba iha ámbitu pás no hakmatek.

“Durante ne’e Liga ne’e la’o kapa’as loos. Entaun, loron 8 fevereiru agora jogu ikus ona. Maski klube rua de’it maka joga hodi taka maibé ami husu ba klube hotu ne’ebé durante ne’e partisipa hela jogu tenke mai hotu hodi asiste ita-nia jogu ikus ne’e,” Diogo dehan liuhosi konferénsia imprensa ne’ebé hala’o iha iha salaun Xanana Sport Center, Bairro Formosa, Dili, tersa ne’e.

Nia dehan, jogadór sira tenke tau hotu farda tanba sei iha distribuisaun prémiu hanesan sertifikadu ba klube hitu seluk ne’ebé la sai kampiaun iha Liga ne’e.

Prémiu ba klube maka hanesan primeiru lugár sei simu trofeiu ida ho osan hamutuk $4500 no sertifikadu.

Aleinde ne’e, komisaun deside atu oferese mós sertifikadu no insentivu $500 ba ema ida mellór markadór no mellór jogadór. Enkuantu, komisaun sei deside klube ida atu sai hanesan fair play time no sei entrega insentivu loos de’it hanesan osan $1000 no sertifikadu.

“Mellór jogadór ami seidauk bele temi tanba jogu seidauk hotu. Maibé, mellór markadór provizóriu jogadór Danilson Almeida hosi klube Assalam ho golu 11,” nia haktuir.

Nune’e, lori komisaun organizadora nia naran sira hato’o felisitasaun ba jogadór no klube hotu ne’ebé durante ne’e koopera di’ak tebes ho komisaun.

“Hosi biban ne’e ami mós fó ami-nia felisitasaun ba klube ualu no jogadór sira ne’ebé durante ne’e koopera di’ak tebes. La haluha ami sei informa katak jogu ikus ne’e sei partisipa hosi delegasaun Asian Football Confederation,” nai dehan.

Orsamentu ba realiza liga refere tulun hosi Asian Football Confederation (AFC) no Federation International Football Association (FIFA).

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here