Responsável Postu Saúde Maloa, Luiza da Costa. Imajen: Nelia Fernandes

DILI, 04 fevereiru 2020 (TATOLI)-Responsável Postu Saúde Maloa, Luiza da Costa hateten, durante tinan 2019 moras ne’ebé domina no rejistu aas iha Postu Saúde Maloa mak moras Infesaun Vias Respiratóriu.

“Iha tinan 2019, moras ne’ebé aas liu iha Postu Saúde Maloa mak infesaun vias respiratóriu hamutuk ema na’in 13.159, infesaun kulit hanesan isin katar ema na’in 2.299, diareia na’in 1.449 no Hipertensaun na’in 1.067. Iha moras barak maibé moras sira ne’e mak aas,” Responsavel Postu Saúde Maloa, Luiza da Costa, ba Agência TATOLI iha nia kna’ar fatin, ohin.

Kauza husi moras ne’e, nia dehan, haree ba infesaun vias respiratóriu ne’e ninia kauza husi ambiente ne’ebé nakonu ho foer, polusaun no mós iklima entaun bailoron naruk ne’ebé afeta ba bee maran.

Nune’e, nia dehan, moras infesaun vias respiratóriu ne’e dala barak atu hamenus ne’e impossibel maibé  kauza ne’e tinan-tinan sempre aumenta.

Nia hatutan, atu halo prevensaun ba moras ne’e, meiu ne’ebé Postu Saúde Maloa hala’o mak halo promosaun saúde ba sira katak bainhira ema ida me’ar presiza taka ibun, labele tafui kaben arbiru, atu nune’e bele da’et fali ba ema seluk.

“Ita presiza halo prevensaun, bainhira mear tenke taka ibun. Me’ar labele tafui kaben arbiru atu nune’e labele da’et ba ema seluk,” nia fó hanoin.

Iha parte seluk, nia informa, Postu Saúde Maloa ne’e tama ba iha área Sentru Saúde Comoro ne’ebé atende komunidade sira iha Suku Bairru-Pité ho totál aldeia hamutuk 26.

“Total área kobertura ne’ebé postu saúde toma konta mak aldeia hamutuk 19 ho totál populasaun ne’ebé ami kobre iha ne’e hamutuk ema na’in 29, 505,” nia haktuir.

Entretantu, nia informa, durante tinan ida iha 2019 nia laran, kazu ka totál ema ne’ebe mai konsulta ka ema vizitante ne’ebé mai asesu iha Postu Saúde Maloa hamutuk ema na’in 63 .145, kazu rezistu moras hamutuk 92.125, totál moras hotu iha Postu Saúde Maloa hamutuk 144.593.

Notísia relevante:Tinan 2019, Moras Infesaun Vias Respitóriu Aas Liu Iha Sentru Saúde Becora

Jornalista : Nelia Fernandes

Editór      : Rafy Belo

HAKEREK NO HATÁN

Please enter your comment!
Please enter your name here