Prezidente Konsellu Veteranu, Vidal de Jesus 'Riak Leman' Wainhira dadalia ho Jornalista sira hafoin hala'o enkontru ho Prezidente Repúblika, Francisco Guterres Lú Olo, iha Palásiu Prezidente Nicolau Lobato, Segunda (03/02/2020). Imajen Tatoli/ Egas Cristóvão

DILI, 03 fevereiru 2020 (TATOLI)–Prezidente Konsellu Kombatente Libertasaun Nasionál, Vidal de Jesus ‘Riak Leman’, hamutuk ho estrutura husu Xefe Estadu, Francisco Guterres Lú Olo, atu hola desizaun ba impase polítika ho imparsialidade tuir Konstituisaun Repúblika Demokrátika Timor-Leste (K-RDTL). 

“Ami mós simu konvite husi Prezidente Repúblika, Francisco Guterres Lú Olo nu’udár Konsellu Kombatente Libertasaun Nasionál. Ami husu ba Prezidente Repúblika atu fó solusaun ba problema impase polítika ne’ebé iha, atu hola desizaun ho imparsialidade tuir Konstituisaun RDTL”, Riak Leman hato’o asuntu ne’e, hafoin hasoru-malu ho Prezidente Repúblika, iha Palásiu Prezidente Nicolau Lobato, Bairru Pité, Dili, ohin.

Ezekutivu Konsellu Veteranu ne’e mós husu ba líder nasionál sira, hanesan mós veteranu atu tuur hamutuk atu rezolve lalais impase polítika ne’ebé iha.

“Husu mós ba Prezidente Repúblika, Francisco Guterres Lú Olo, liuliu ba maun-boot sira hanesan Kay Rala Xanana Gusmão, Marí Alkatiri, Ramos Horta, Primeiru-Ministru, Taur Matan Ruak, Lere Anan Timur atu tuur hamutuk, ko’alia ba malu, rona malu, atu hetan lalais solusaun di’ak ba situasaun ne’e”, nia husu.

Riak Leman mós fó hanoin katak, uluk iha funu, sira na’in hira oan ne’e maka hamutuk ho povu, hamutuk ho veteranu sira, hamutuk ho joven sira, hodi hakotu funu ne’ebé naruk tebes.

Tanba ne’e, Prezidente Konsellu Veteranu ne’e konsidera impase polítika ne’ebé mosu, hanesan problema ki’ikoan.

“Ami husu maun-boot sira katak, haree ba, hanoin ba, tanba ita-nia povu terus barak ona. Ema barak maka halerik, ema barak maka terus, ema barak maka hein hela ahi atu lakan, hein hela estrada atu di’ak, barak maka bee-moos laiha, sutuasaun barak maka agora ita enfrenta hela. Ida-ne’e hanesan naha todan ida, serbisu todan ida, tanba ne’e sira tenke hamutuk duni atu rezolve”, nia sujere tan.

Reak Leman mós fiar katak sira sei hamutuk tanba sira mesak veteranu de’it, hotu-hotu hatene didi’ak katak situasaun ne’ebé ema hotu enfrenta todan tebes.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here