Ministru Negósiu Estranjeiru no Kooperasaun, Dionísio da Costa Babo Soares. Imajen Tatoli/Egas Cristóvão

DILI, 03 fevereiru 2020 (TATOLI)—Ministru Negósiu Estranjeiru no Kooperasaun (MNEK), Dionísio da Costa Babo Soares, fó-sai katak timoroan inklui estudante timoroan iha Repúblika Populár Xina hamutuk na’in-177.

Dionísio hato’o informasaun ne’e, ohin, hafoin Parlamentu Nasionál no Ministériu Negósiu Estranjeiru no Kooperasaun, Ministériu Saúde no Ministériu Defeza no Seguransa, hala’o debate urjénsia ida hodi halo diskusaun kona-ba ba prevensaun to’o posibilidade tula fila estudante na’in-17 ne’ebé oras ne’e iha sidade Wuhan, Xina.

Debate urjénsia ne’e hala’o hafoin bankada Parlamentár FRETILIN hatama rekerimentu ida hodi diskute asuntu virus Corona ne’e ho urjénsia. Pedidu urjénsia hosi FRETILIN hatama iha semana rua liubá.

Dionísio fó-sai katak estudante na’in-17 oras ne’e hela nafatin iha Wuhan ho kondisaun di’ak.

“Iha Xina ita iha estudante 177 ka sidadaun ne’ebé rejistadu. Hosi 177 ne’e iha rejiaun Beijing, Tian Jhen, Heibei, Xandon ho Ninshia hela hamutuk ema na’in-38. Iha rejiaun Shanhai ho Jeizan iha ema na’in-18. Rejiaun Wuhan ho Anhui iha ema na’in-22. Iha Wuhan ne’ebé moras mosu, ita iha estudante 19, maibé na’in-rua antes ne’e ami lori tiha Beijing, falta de’it estudante na’in-17 maka iha ne’ebá” nia informa liuhosi plenária ordinária, iha Parlamentu Nasionál.

Nia hatutan, bainhira Governu Xinés deside taka tiha hotu sidade Wuhan ne’e para ema labele tama, estudante na’in-17 hela nafatin iha Wuhan iha dormitóriu ka koléjiu universidade nian to’o agora.

Nune’e mós, timoroan sira iha rejiaun Zian Shu, Heinan, Shian, Ganshu no Lanshu iha ema na’in-30 no mós rejiaun Harbei iha ema na’in-11. Purtantu Ghuanshi, Gandon, Hiunan iha ema na’in-20, iha Macau iha ema na’in-lima (5).

“Iha Macau ne’e parese relijiozu sira, ne’e frater sira hosi Kongregasaun Dominikana no Sagrado Coração de Jesus, iha Macau rasik iha ema na’in-9, iha mós ema na’in-6 ne’ebé la’ós relijiozu. Hosi mós Beijing, Wuhan no Daltan iha tan ema na’in-18 ne’ebé hosi F-FDTL. Ne’ebé, hamutuk ema na’in-177 maibé sira iha-ne’ebá ne’e maka estudante sira de’it”, nia haktuir.

Nia fó-sai katak oras ne’e estudante sira-ne’e kondisaun di’ak hotu no hela hamutuk hotu iha fatin ida protejidu hela no semana kotuk sira sujeita ba teste ida maibé labarik sira-ne’e nein hetan virus Corona.

Nia hatutan, Embaixada Timor-Leste iha Beijing kontaktu permanente ho sira no Governu haruka osan uitoan para sira bele aguenta semana rua no semana tolu nian ba hahán.

“Soké, estudante sira labele sai hosi dormitóriu universidade nian. Sidade ne’e kuaze dezertadu. Sidade dezertadu ema labele la’o halimar iha lurón, labele la’o sein kontrolu hosi autoridade sira, pratikamente ospitál sira-ne’e nakonu hotu kedas. Iha-ne’ebá kontrolu hotu hosi militár”, nia katak.

Dionísio Babo Soares, hateten universidade hosi Wuhan ne’e rasik fó atensaun ba estudante na’in-17 ne’e.

“Ami iha kontaktu permanente ho Embaixada Xina iha ne’e para tau atensaun nafatin ba sira no mós ba haree sira-nia hahán. To’o ohin, sira iha sira-nia fatin di’ak hela”, nia tenik.

Nia subliña, tuir dadus ne’ebé iha moras ida-ne’e to’o ohin loron afeta ona liu ema na’in-80.000 iha mundu tomak.

Tanba ne’e, Organizasaun Mundiál ba Saúde (OMS) deklara alerta globál ka situasaun emerjénsia globál kona-ba virus ida-ne’e ninia ameasa

“Ita-boot sira hatene katak Singapura suspende hotu ona Vó hotu-hotu ba no tama Xina. Austrália mós suspende hotu ona katak Vó ne’ebé ema hosi Xina atu tama Austrália. Indonézia mós horikalan bandu ona ema Xina hotu kedas labele tama. Filipina mós hanesan, Rússia, Amérika, kuaze país barak iha mundu. Ita Timor-Leste laiha Vó direitu hosi Xina, laiha kontaktu direitu hosi Xina, tantu via terrestre no aéreu”, Ministru Dioníso informa.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here