Oscar Lima. Imajen Tatoli/António Gonçalves

DILI, 03 fevereiru 2020 (TATOLI)–Prezidente Câmara Comércio Indústria Timor-Leste (CCI-TL), Oscar Lima hateten setór privadu la preparadu no lakohi Eleisaun Antesipada (EA). 

“Ha’u hakarak hateten katak setór privadu la preparadu no lakohi Eleisaun Antesipada (EA). Ida-ne’e ami-nia direitu hanesan sidadaun, emprezáriu nasionál, hanesan mós Prezidente CCI-TL”, Oscar Lima hato’o asuntu ne’e, hafoin lidera emprezáriu nasionál sira ne’ebé hamahan-an iha CCI-TL, hasoru-malu ho Prezidente Repúblika, Francisco Guterres Lú Olo, iha Palásiu Prezidente Nicolau Lobato, Bairru Pité, Dili, ohin.

Nia esplika, emprezáriu timoroan sira husi CCI-TL simu konvite husi Prezidente Repúblika, Francisco Guterres Lú Olo, atu mai hato’o netik hanoin kona-ba situasaun rai-laran.

Emprezáriu ne’e informa, liafuan sira ne’ebé maka CCI-TL hato’o ba Prezidente Repúblika absolutamente buat barak labele fó-sai ba públiku, tanba ida-ne’e entrega kompeténsia tomak iha Xefe Estadu atu deside tuir direitu iha Konstituisaun RDTL no direitu prerogativu husi Prezidente rasik.

Hanesan emprezáriu, nia haktuir, sente katak situasaun polítika ne’e lori tristeza boot ba atividade ekonomia rai-laran.

“Situasaun ida-ne’e, la’ós de’it setór privadu maka mesak sente, maibé setór hotu-hotu sente situasaun ida-ne’ebé ladi’ak. Ekonomia sei hakdasak tebe-tebes, emprezáriu barak sei taka sira-nia atividade ekonómika, no barak taka tiha ona. Ohin mós ko’alia ho Prezidente Repúblika kona-ba ida ne’e. Atu ko’alia loloos karik, dehan katak, agora daudaun ita iha situasaun ida-ne’ebé grave tebes. Ida-ne’e afeta maka’as tanba dezempregu sei sa’e aas ba beibeik. Bainhira ita kontinua nafatin ho situasaun ne’e, ha’u hanoin ita la rezolve ita-nia problema”, nia hateten ba mídia.

Maski laiha dadus kompletu, maibé Prezidente CCI-TL ne’e rekoñese katak emprezáriu balun taka duni ona sira-nia atividade.

“Ami hakarak loloos maka tenke rezolve impase, tanba krize ne’e naruk liu ona. Se lae, hamate setór privadu sira. Ida-ne’e maka ami hakarak no ami lakohi EA tanba laiha benefísiu ba ami”, nia hateten.

Tuir ajenda, aban, Prezidente Repúblika sei hala’o enkontru ho Konsellu Estadu iha Palásiu Prezidente Nicolau Lobato.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here