Sekretáriu Estadu Ambiente (SEA), Demétrio de Amaral de Carvalho. Imajen/Tatoli Egas Cristovao

DILI, 03 fevereiru 2020 (TATOLI) – Sekretáriu Estadu Ambiente (SEA), Demétrio do Amaral de Carvalho, husu ba estudante Ensinu Báziku Sentrál (EBC) Esperansa da Pátria inklui estudante iha territóriu laran atu sai ajente transformadór ba asegura ambiente iha família, sosiedade no nasaun atu garante sidadaun hotu moris ho saudavel.

“Hakarak husu ba estudante sira iha territóriu Timor-Leste tomak ne’ebé aprende ona jestaun lixu iha eskola liuliu soe fo’er iha fatin atu sai ajente transformadór ba nia família, sosiedade no nasaun hodi asegura ambiente saudavel”, SEA Demétrio dehan iha resintu eskola Esperansa da Pátria iha Becora, ohin.

SEA dehan kada sidadaun tenke esforsu no kuidadu ambiente liuhusi kuda ai-oan no labele soe lixu arbiru, mak ambiente mós bele fó iis saudavel ba nia emar sira.

“Ita-nia alin oan ka estudante sira (EBC Esperansa da Pátria), ne’e aprende ona ita husu ba uma karik fó hatene ba nia inan-aman atu dansa rai karik labele soe iha valeta sira hodi hamosu inundasaun no moras ba ita aan rasik”, husu.

Eis Deputadu Parlamentu Nasionál ne’e dehan kontinua koopera ho Ministériu Edukasaun, Juventude no Desportu atu mellora Programa Eskola Verde ba kada EBC sira atu estudante sai ajente ba asegura ambiente.

“Rai ne’e mak ita-nia inan, ita hetan oksijéniu husi ai ne’ebé ita kuda ba rai, ita hetan bee husi ai ne’ebé ita kuda ba rai, ita hetan ai-han-husi rai ne’ebé buras, tanba ne’e ita tau-matan ba ambiente, ita tau-matan ba ita-nia rai, ita kuidadu ita-nia futuru rasik”, katak.

SEA mós husu ba sidadaun hotu liuliu estudante sira atu hateten lae ba plástiku tanba plástiku fó efeitu makaas ba ambiente. Enkuantu, Polítika Jerál Ambiente iha Timor-Leste hakarak implementa dezagregasaun lixu (disagregasi sampah) tanba daudaun uza ne’e tratamentu lixu solidu urbanu ne’ebé define hela iha Sestu Governu Konstitusionál.

Demétrio dehan ba futuru dezagregasaun lixu tenke iha fatin hotu atubele hamenus lixu ba Tibar. “Agora, ita imajina karreta baskulante 33 kada loron lalin lixu husi Dili bá Tibar, maibé lixu kontinua ho kuantidade boot tebes, mas depende mós ba vontade kada umakain atu organiza nia lixu rasik”, katak.

Notísia relevante : EBC Esperansa da Pátria Modelu ba Programa Eskola Verde iha Timor-Leste

Jornalista : Florencio Miranda Ximenes

Editora : Maria Auxiliadora

HAKEREK NO HATÁN

Please enter your comment!
Please enter your name here