Prezidente Konsellu Veteranu, Vidal de Jesus 'Riak Leman'. Imajen Tatoli/ Egas Cristóvão

DILI, 03 fevereiru 2020 (TATOLI)–Prezidente Konsellu Kombatente Libertasaun Nasionál, Vidal de Jesus ‘Riak Leman’, husu ba lulik no matebian rihun atus-rua resin hodi fó hanoin ba ukun-na’in sira tuur hamutuk atu hetan lalais solusaun ba impase polítika. 

“Husu ba rai-lulik sira, uma-lulik sira, matebian sira ne’ebé mate ona rihun atus-rua resin, pelumenus fó hanoin ba sira, fó tulun ba sira, atu sira bele tuur hamutuk hodi fó solusaun ba impase polítika ida-ne’e”, Riak Leman husu ne’e, hafoin ho estrutura Konsellu Kombatente Libertasaun Nasionál hasoru-malu ho Prezidente Repúblika, iha Palásiu Prezidente Nicolau Lobato, Bairru Pité, Dili, ohin.

Riak Leman mós fó hanoin nafatin ba ukun-na’in sira atu loke matan ba povu ne’ebé terus barak ona, tanba impaktu husi situasaun ne’e.

“Ami husu maun-boot sira katak, haree ba, hanoin ba, tanba ita-nia povu terus barak ona. Ema barak maka halerik, ema barak maka terus, ema barak maka hein hela ahi atu lakan, hein hela estrada atu di’ak, barak maka bee-moos laiha. Situasaun barak maka agora ita enfrenta hela. Ida-ne’e hanesan naha todan ida, serbisu todan ida, tanba ne’e sira tenke hamutuk duni atu rezolve”, nia sujere.

Prezidente Konsellu Veteranu mós apela ba povu tomak, veteranu, foin-sa’e sira, tuur hakmatek, fiar iha maun-boot sira, liuliu Prezidente Repúblika, atu hasai desizaun ne’ebé di’ak hodi hakotu impase ida-ne’e.

Nia fó ezemplu, krize 2006 hatudu ona katak ki’ik halo problema, to’o ikus ki’ik nia uma maka ema sunu, povu ki’ik nia sasán maka ema estraga.

Tanba ne’e, nia husu atu hotu-hotu fó konfiansa ba FALINTIL-Forsa Defeza Timor-Leste, Polísia Nasionál Timor-Leste, tanba knaar kona-ba seguransa sira maka kaer, no husu ba ema hotu hein desizaun husi Xefe Estadu.

Entretantu, líder nasionál sira ne’ebé Riak Leman temi maka hanesan Prezidente Repúblika, Francisco Guterres Lú Olo, Kay Rala Xanana Gusmão, Marí Alkatiri, Ramos Horta, Primeiru-Ministru, Taur Matan Ruak no Lere Anan Timur.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here