Reprezentante Organizasaun Nasaun Unida (ONU) iha Timor-Leste, Roy Trivedy (liman loos). Imajen Tatoli/Julia Chatarina

DILI, 03 fevereiru 2020 (TATOLI) – Reprezentate Organizasaun Nasaun Unida (ONU) iha Timor-Leste, Roy Trivedy, apela ba mídia sira atu fahe informasaun ho loloos no labele halo ema sai pániku, tanba mídia sai papél importante ba sosiedade.

Reprezentante ONU ko’alia asuntu ne’e, relasiona ho informasaun Virus Corona ne’ebé espalla ba públiku liuhosi meiu rede sosiál no mídia sira.

“Ami mós hakarak hato’o ba ita boot sira nu’udár mídia katak, mídia hanesan papél importante tebes atu fó informasaun ne’ebé loos no labele halo ema sai tauk ka pániku ho informasaun ne’ebé la verifikadu. Ne’e duni husu ba ita boot sira akompaña nafatin istória ne’e liuhosi fonte ne’ebé ita bele fiar”, dehan Roy Trivendy iha Palásiu Governu, segunda ne’e.

Nia subliña, bainhira mídia atu hato’o informasaun ruma tenke husi fonte ruma hanesan Governu ka parseiru sira Hosi ONU, Organizasaun Saúde Mundiál (OMS) nian atu hetan nafatin informasaun ne’ebé loos.

Roy trivedy salienta, ONU prontu atu hato’o informasaun no dadus ne’ebé mídia sira iha Timór presiza.

“Ami husi Nasaun Unida prontu hato’o informasaun ba ita boot sira bainhira ita boot sira presiza atu hetan dadus no informasaun ne’ebé los atu evita ema tuir informasaun hanesan ita boot sira akompaña ne’e”, nia esklarese.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here