Imajen hosi express.co.uk

INGLATERRA, 3 fevereiru 2020 (TATOLI) – Asosiasaun Timoroan iha Inglaterra husu ba Timoroan sira ne’ebé agora daudaun iha Inglaterra atu obedese ba lei foun kona-ba BREXIT nian.

“Nu’dar imigrante, ita nia obrigasaun mak obedese ba lei foun, báziku liu mak regulariza ita nia situasaun atuál (renova passaporte), hetan settle status hodi bele hela no servisu nafatin iha Reinu Unidu (RU)”, hatete Prezidente TAIS (Timorese Association Inclusive Support North Ireland), Feliz de Jesus.

Nia hatutan BREXIT ninia efeitu mak la ho dupla nasionalidade maibé sei afeta liu Timoroan ne’ebé hakarak tama RU post-Brexit, seluk mak limita livre sirkulasaun.

“Vistu turista ne’ebé loke ba Timoroan sirkula livre iha nasaun 27 membru Uniaun Eropea lakon essénsia iha RU post-Brexit, relasaun bilaterál Timor-Leste ho RU mak prevalese. UK United Kingdom/Reinu Unidu) post – Brexit iha possibilidade bo’ot implementa kriteriu migrasaun selectiva maibé ba profisionál sira, menus ba mão-de-obra barata ne’ebé funsiona kleur ona iha Austrália no fatin seluk. Se situasaun ekonómika UK obriga. BREXIT mos sai hanesan oportunidade di’ak ba Timor-Leste hodi halo aranju foun iha kooperasaun bilaterál”, afirma tan.

Adylson Lemos, Timoroan ne’ebé hela iha Northwich, hateten triste ho desizaun ne’e, maibé hakarak ka lakohi tenke kumpre regra foun ne’ebé RU estabelese.

“Ita iha passaporte portugés, ha’u hanoin ita tenke halo tuir norma no leis foun iha Reinu Unidu”, dehan nia.

Moises Santos, Timoroan iha Bristol, hateten: “Reinu Unidu sei adopta sistema hosi nasaun Austrália nian katak sei la haree ba passaporte nia koor maibé sei foku liu ba ema. Depois Reinu Unidu ofisialmente sai hosi UE (Uniaun Eropea) mak RU sei fó oportunidade ba ema hosi mundu tomak ne’ebé mak iha High Skills”.

Moises haktuir tan: “Governu sei iha fulan 11 atu hatuur lei ba imigrasaun, hosi parte seluk lei imigrasaun mos sei iha mudansa hanesan haktuir hosi pájina governu Britániku nian ba sidadaun Europea no sira nia família katak komesa hosi loron 31 dezembru 2020 resident permanent sei la vale, karik sidadaun Eropea ho sira nia família sei hakarak hela iha RU liu hosi 30 juñu 2021, tuir pájina governu Britániku husu ba sidadaun Eropea ho sira nia família hotu atu bele apply ba Settlement Status ou British Citizenship”.

Nune’e mós Liza Jeronimo, Timoroan ne’ebé hela iha sidadi Bridgwater, hatuir: “Impaktu husi Brexit ha’u seidauk sente loloos ninia efeitu, mas ita la hatene karik fulan neen mai ita bele ona sente impaktu pozitivu ou negativu hosi Brexit ne’e iha nivel ekonómiku, saéde, traballu, edukasaun, ambiente servisu no seluk tan”.

Kontribuinte: Celso Oliveira

Editór: Rafy Belo

HAKEREK NO HATÁN

Please enter your comment!
Please enter your name here