Prezidente Komité Orentadór 25 (CO25), Constâncio Conceição Pinto.

DILI, 03 fevereiru 2020 (TATOLI) – Komité Orientadór 25 ne’ebé hanesan úniku instituisaun Governu, estabelese bazeia rezolusaun númeru.1/2017 hanesan ekipa ne’ebé hetan knaar halo peskiza, entrevista no hakerek istória Timor-Leste, daudaun ne’e iha ona faze atu hakerek.

Prezidente Komité Orientadór 25, Constâncio Conceição Pinto, hateten komité ninia serbisu daudaun ne’e to’o ona iha pontu ida mais altu atu hahú hakerek ona.

“Iha tinan kotuk nia laran ami halo peskiza, rekolla dadus iha rai laran no mós iha rai li’ur, husi dadus eskritu, entrevista iha tinan kotuk. Ami halo mós konferénsia munisipál no konferénsia nasionál no hetan apoiu tebes husi munisípiu sira no husi ita nia veteranu sira, agora to’o ona faze atu hakerek ona livru”, tenik Constâncio ba Agência TATOLI iha ninia knaar fatin, Palásiu Governu, segunda ne’e.

Tuir nia, komité atu hakerek pur volume no fahe istória ne’e pur volume neen, hahú husi faze tinan 1974 to’o referendu ninian.

“Ita nia istória kompleksu tebes, entaun presiza halo investigasaun kle’an ho ida-ne’e bele hetan faktu verifikadu. Ami nia objektivu ne’e atu hakerek livru istória sientífika ne’ebé sei bazeia ba estudu sientífiku”, nia karesenta.

Constâncio subliña, Komité Orientadór 25 iha peskizadór 1000 ne’ebé mai husi dosente universidade sira no iha voluntáriu na’in-10 resin ne’ebé ajuda halo transkrisaun ba entrevista ne’ebé kle’an.

“Kontribuisaun sidadaun sira nian hodi hakerek ba istória no esperiénsia ba revista Komité Orientadór 25 nian. Ita sei publika nafatin, atu nune’e públiku bele hatene istória. Tanba ho ida ne’e mak ita bele envolve sidadaun tomak iha diskusaun kona-ba istória”, nia salienta.

Nia ko’alia oituan kona-ba dezafiu durante hala’o knaar hahú tinan kotuk mak osan laiha no atu hetan loloos fonte ne’ebé mak di’ak tanba balun to’o agora sei tauk atu ko’alia loloos.

“Entaun tenke buka tuir atu bele verifika faktus. Dalaruma autór ida hasoru peskizadór oin-oin de’it, entaun ema mós baruk atu ko’alia no la fó informasaun ne’ebé loloos”, nia dehan tan.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here