Komandante Jerál PNTL, Komisáriu Faustino da Costa. Imajen/Tatoli

DILI, 03 fevereiru 2020 (TATOLI)- Komandante Jerál Polisia Nasionál Timor-Leste (PNTL), Komisáriu Faustino da Costa, ohin, hala’o enkontru jerál ho estrutura komandu operasaun PNTL no komandante polisia munisípiu hotu-hotu hodi kria koordenasaun atu tau atensaun ba eis grupu arte marsiál (GAM).

Notísia Relevante : Eis GAM Atake Malu iha Samagia, Na’in Tolu Kanek

Ba asuntu eis GAM nian ne’e, Komisáriu Faustino da Costa, husu atu komandu operasionál ho komandante munisípiu sira atu koordena ho autoridade suku atu evita konflitu eis GAM sira hanesan foin lalais ne’e akontese iha Aldeia Samagia, Suku Tekinomata, Postu Administrativu Laga, Munisípiu Baucau.

“Ida ne’e enkontru koordenasaun ho komandante diresaun jerál hotu- hotu husi Komandu jerál depois orsamentu Sumba iha Parlamentu Nasionál, PNTL no F-FDTL hasai karta diretiva konjunta hodi asegura seguransa hodi prevene krime iha terrenu,” hateten Komisáriu Faustino da Costa, ba jornalista iha Kuartél Jerál, Caicoli, Dili.

Polisia Munisípiu Dili mós kaptura ona suspeitu ida ne’ebé taa kanek vítima balun iha área Largo Lesidere, Dili,  domingu kalan (02/02/2020).

Kazu ne’e rasik PNTL halo identifikasaun envolve eis membru grupu organizasaun arte marsiál sira ne’ebé estadu taka ona.

Entretantu iha parte seluk, Komandu PNTL no komandante sira diskute mós programa sira ne’ebé sei hala’o iha selebrasaun aniversáriu PNTL nian iha loron 27 marsu ne’e.

Ajenda seluk tan mak, Komandu PNTL diskute mós planu no programa sira ne’ebé presiza halo iha tinan 2020 hodi uza Dotasaun Orsamentu Temporáriu (DOT) ne’ebé Ministériu Finansas distribui ona.

Komisáriu Faustino esplika, ba OJE 2020 ne’ebé sumba afeta mós ba programa PNTL nian atu halo rekrutamentu ba mekániku ofisina na’in ualu (8) ne’ebé daudauk ne’e UNDP maka fó hela kontratu  hodi manutensaun ba transporte PNTL nian.

“Durante ne’e UNPD mak rekruta mekániku na’in 8 hodi servisu iha ofisina, no tuir akordu UNDP entrega ona mekániku sira ne’e ba PNTL iha fulan Janeiru 2020 ba oin tama iha kontratu servisu, maibé tanba orsamentu la iha prosesu sei adia fali no ami husu fali ba UNDP maka sei kontinua selu direitu,” tenik nia.

Mekániku sira ne’e durante ne’e servisu halo manutensaun ba transporte polisia nian iha Munisípiu Dili, Baucau, Oekusi, no Bobonaro.

Investiga Membru Na’in Hitu  Envolve iha Eis GAM

Iha biban ne’e, Komandu Jerál Polisia Nasionál Timor-Leste (PNTL) fó ona orientasaun ba Departamentu Dixiplinár PNTL hodi loke prosesu investigasaun ba membru polisia na’in ne’ebé deskonfia envolve iha eis GAM.

Komisáriu, Faustino da Costa, dehan nia parte simu ona informasaun kona-ba kandidatu Ofisiál Inspetór Asistente polisia na’in 53 ne’ebé ba tuir hela treinamentu fíziku iha Sentru Treinamentu Rairobu, Postu Administrativu Atabae, Munisípiu Bobonaro, deskonfia membru na’in hitu (7) ativu envolve iha eis GAM.

Nia dehan, bainhira prosesu investigasaun maka identifika membru sira ne’e envolve duni iha eis GAM, PNTL sei la promove sira nia diviza iha selebrasaun loron aniversáriu PNTL iha loron 27 marsu ne’e.

“Prosesu investigasaun agora la’o hela, se sira na’in 53 ne’e maka balun envolve duni ou lae, ita hein prosesu hotu maka ita sei foti desizaun tuir lei,” Komisáriu Faustino da costa afirma.

Nia hateten, dixiplina hanesan baze ida hodi hamosu livre vontade husi membru sira hodi haklaken devér no obrigasaun ho profisionalizmu no labele sente iha presaun.

Iha fatin hanesan, Diretór Sentru Formasaun Polisia Akademia Comoro Dili, Superintendente  Arquimino Ramos, rekoñese, husi membru polisia na’in 53 ne’ebé tuir promosaun ba ofisiál inspetór, iha membru balun envolve iha eis GAM.

Nia dehan, parte Sentru Akademia Polisia Comoro entrega ona ba Komandu Jerál PNTL maka sei foti desizaun.

“Ha’u rona duni informasaun dehan sira (polisia balun) envolve sei hetan sansaun tuir regulamentu dixiplinár,” dehan Arquimino ba jornalista via telefone.

Iha parte seluk, Ajénsia TATOLI halo konfirmasaun ho  Xefe Departamentu Justisa PNTL Superintendente, António Mauluta, kona-ba situasaun ne’e, maibé seidauk bele fó komentáriu tanba okupadu ho servisu.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here