Prezidente CDN-CNRT atuál Ministru Negósiu Estranjeiru no Kooperasaun, Dionísio da Costa Babo. Imajen/ Tatoli Egas Cristóvão

DILI, 03 fevereiru 2020 (TATOLI)—Ministru Negósiu Estranjeiru no Kooperasaun, Dionísio da Costa Babo Soares, hateten oras ne’e Governu tenta hela atu transporta estudante timoroan na’in-17 iha sidade Wuhan, Repúblika Populár Xina.

“Ami tenta hela halo nusá mak aproveita sira-nia transporte aéreu bainhira ba lalin sira-nia ema, bele inklui mós ita-nia estudante 17 ne’e. Horibainrua ami hetan resposta pozitiva hosi señor ministru ida hosi Portugál nian atu ba foti sira-nia ema no tula mós ita-nia ema, maibé to’o oras ne’e buat ne’e iha ámbitu Europeiu nian, país Europeiu balun la konkorda, la fó resposta, burokrasia iha Hubei iha Xina ne’e maka’as tebes atu husik ita-nia estudante sira-ne’e sai”, Ministru Dionísio informa liuhosi plenária Parlamentu Nasionál, segunda ne’e.

Governante ne’e hateten, agora daudaun estudante sira mantein nafatin iha ne’ebá, maibé esforsu Governu nian la’o hela.

“Ita tenta hela ho nasaun sira seluk. Ha’u lalika temi naran tanba diskusaun ne’e sei la’o namanas no informasaun ne’ebé ami iha kona-ba ita-nia estudante na’in-17 ne’e kompletu hotu ona integra hotu ba nasaun sira-ne’e. Maromak tulun buat hotu-hotu la’o di’ak iha loron hira-ne’e karik sira bele transporta sai, tanba aviaun atu tama ba iha ne’ebá mós susar no atu sai mós susar”, nia haktuir.

Dionísio informa, iha Xina atu sai hosi uma ida ba de’it aeroportu mós la’ós fásil tanba kontrolu hosi médiku Xinés restritu tebes.

“Ita iha inisiativa haruka ita-nia aviaun mesak ka aluga tanba Governu aprova tiha ona orsamentu uitoan bele ba foti sira maibé ita tenke iha fasilidade ne’ebé di’ak para to’o mai tenke tau sira iha fatin observasaun ida pelumenus loron 14 nia laran antes husik ba iha komunidade”, nia informa.

Iha semana kotuk iha Konsellu-Ministru, Governu hola tiha ona medida inklui prepara rekursu ne’ebé nesesáriu iha abertente rua. Dahuluk, atu liga ho estudante sira estuda hela iha Xina. Daruak, fó instrusaun ba Ministériu Saúde, Ministériu Defeza no Seguransa, Ministériu Interiór atu hola medida halo kontrolu iha rigorozu kona-ba virus Corona ne’e.

Purtantu, Deputadu Bankada FRETILIN, Antoninho Bianco, husu kontinua koopera ho Xina nune’e tau-matan ba estudante timoroan hirak-ne’e.

“Ita hatene katak Xina apoia barak ba ita. Ha’u la fiar sira na’in-17 ne’e sira labele tau-matan”, nia katak.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here