Diretór Ezekutivu Nasionál Compact Developmement Team Timor-Leste (CDT-TL), Embaixadór Constâncio Conceição Pinto. Imajen Tatoli/Egas Cristóvão

DILI, 03 fevereiru 2020 (TATOLI) – Governu liuhosi reuniaun Konsellu Ministru iha 29 janeiru, aprova Proposta Deliberasaun , ne’ebé aprezenta husi Ministru Reforma Lejizlativa no Asuntu Parlamentár, Fidelis Manuel Leite Magalhães, kona-ba alterasaun ba Akordu Subvensaun no Implementasaun entre Governu Timor-Leste no Millennium Challenge Corporation (MCC) ba dezenvolvimentu atu fasilita implementasaun kompaktu Millennium Challenge.

Diretór Ezekutivu Nasionál Compact Developmement Team Timor-Leste (CDT-TL), Embaixadór Constâncio Conceição Pinto, relata alterasaun akordu ne’e tanba iha aumentu fundu husi MCC ba implementasaun programa kompaktu.

CDT-TL prepara proposta no aprezenta iha Konsellu Ministru hodi hetan aprovasaun hafoin haruka ba MCC hodi hetan transformasaun no aprova. Nune’e proposta ne’ebé submete ona iha MCC no hetan aprovasaun hamutuk rua, kompostu husi água, saneamentu no dreinajen iha Dili, Ermera no Bobonaro no projetu ida fali mak kona-ba edukasaun ne’ebé haree ba konstrusaun fízika, treinamentu profesór.

“Alterasaun ne’e tanba MCC aumenta tan grant (fundu) millaun $3 resin husi montante inisiál millaun $7,380. Nune’e totál orsamentu sai millaun $11 resin. MCC hasa’e osan ba iha estudu água, saneamentu no dreinajen iha munisípiu Dili, Ermera no Bobonaro, no mós sentru bee iha Dili sira”, tenik Diretór Ezekutivu ba Agência TATOLI iha nia knaar fatin, Palásiu Governu, Segunda ne’e.

Nia dehan, osan millaun $11 resin ne’e ba estudu no selu espesialista sira husi CDT-TL atu halo akizisaun ba tékniku sira ne’ebé MCC mak sei halo ho kompañia sira iha área relevante atu hala’o estudu viabilidade.

“Estudu viabilidade komesa iha fulan fevereiru nia laran no sei iha ekipa ida atu halo estudu viabilidade ba água, saneamentu no dreinajen iha munisípiu seluk. Enkuantu iha fulan marsu sei iha ekipa ida halo estudu viabilidade ba projetu edukasaun”, Embaixadór akresenta.

Akordu Governu Timor-Leste no MCC

Iha loron 3 maiu 2019, Ministru Reforma Lejislativa no Asuntu Parlamentár, Fidelis Manuel Leite Magalhães no Diretór Jerál MCC ba Europa, Asia Pasífiku no Amérika Latina, Caroline T. Nguyen, asina akordu fundu implementasaun ba dezenvolvimentu kompaktu Timor-Leste.

Governu Timor-Leste ho MCC antes ne’e asina akordu ida hanesan engajamentu inisiál atu prepara ekipa CDT-TL no ninia preparasaun ba proposta Compact Development Project.

Iha akordu fundu implementasaun projetu, Governu Timor-Leste kontribui orsamentu ho valór $650.000 hodi hahú prosesu, enkuantu MCC kontribui $7,380 ba estudu viabilidade no preparasaun.

Tuir Embaixadór Constâncio, montante osan ne’ebé prevee husi MCC hanesan montante previzaun tanba ne’e bele iha mudansa, depende proposta husi CDT-TL hamutuk ho ministériu relevante hanesan Ministériu Obra Públika, Ministériu Ensinu Superiór, Siénsia no Kultura, no ekipa MCC nian atu defini loloos montante ne’ebé mak sei hetan.

Implementasaun kompaktu ba tinan lima no tenke gasta hotu fundu tanba MCC sei la fó estensaun ba implementasaun projetu.

“Tanba ne’e ita presiza prepara-an didi’ak atu nune’e bainhira implementasaun, laiha buat ida mak impede no tinan lima nia laran bele gasta osan ho di’ak”, Constâncio salienta.

Nia hatutan: “Hahú implementasaun depende akordu ho kompaktu ba projetu rua, ami nia alvu mak bainhira buat hotu la’o ho di’ak ami sei asina tan iha fulan setembru 2020 no janeiru tinan oin, hafoin asina kompaktu ne’e sei  iha kompaktu preparasaun fulan tolu ka haat mak foin tama iha implementasaun ba projetu ne’e”.

Entretantu, tuir nota ne’ebé asesu iha portál ofisiál governu, programa ida-ne’e sei haree liuliu kona-ba oinsá hatán ba dezafiu ekonómiku sira ne’ebé país ida hasoru, espesifikamente tuir saida maka Timor-Leste no MCC identifika hamutuk ona ho objetivu atu halakon moris-kiak no hasa’e kresimentu ekonómiku nasionál no ninia komponente haat hanesan fornesimentu bee moos, saneamentu no drenajen, edukasaun, nutrisaun no rezolusaun disputa komersiál sira.

Jornalista: Julia Chatarina

Editór: Xisto Freitas

HAKEREK NO HATÁN

Please enter your comment!
Please enter your name here