Vise-Governadór BCTL, Venancio Alves Maria. Imajen Tatoli/António Gonçalves

DILI, 03 fevereiru 2020 (TATOLI) – Fundu Mina-rai Timor-Leste nian ne’ebé termina iha 31 dezembru 2019, sa’e ba biliaun U$17,69 kompara ho trimestre dahuluk nian mak biliaun U$17,55.

Vise-Governadór Banco Central de Timor-Leste (BCTL), Venancio Alves Maria, hateten tuir relatóriu BCTL hatudu katak totál reseita mak simu hosi trimestre ne’e hamutuk millaun $156,82, ne’ebé kompostu hosi kontribuisaun kontribuinte sira ba fundu hamutuk millaun $70,09, no pagamentu realeza (royalty) simu hosi Autoridade Nasionál Petróleu (ANP) hamutuk millaun $86,72.

“Osan ne’ebé maka sai durante trimestre ne’e hamutuk millaun $552,48 kompostu hosi millaun $549 transferénsia ba Orsamentu Jerál Estadu no kustu jestaun millaun $3,48”, Venancio Alves Maria informa iha lansamentu relatóriu Fundu Petrolíferu ba dala-58 iha edifísiu BCTL, Avenida Bispo Madeiro, ohin.

Vise-Governadór ne’e hatutan, rendimentu hosi investimentu fundu nian hamutuk millaun $530,32 kompostu hosi kupaun no jurus ne’ebé simu maka millaun $96,99, mudansa iha valór merkadu nian millaun $439,32 no movimentu kambiál lakon mak millaun $1,13 iha trimestre ne’e.

“Ne’e rezulta rendimentu ba karteira fundu nian durante trimestre ne’e porsentu 3,05 enkuantu rendimentu sasukat ou benchmark nian ba períodu ne’e maka porsentu 3,07”, katak.

Iha lansamentu relatóriu (trimestre datoluk) nian ne’ebé termina iha 30 setembru 2019 ho fundu hamutuk biliaun US$17,55 ne’e nia reseita ne’ebé tama hosi taxa no royalty (realeza) millaun $166,70 no osan ne’ebé sai durante trimestre ida ne’e millaun $203,24 kompostu hosi millaun $200 transfere ba Orsamentu Jerál Estadu no millaun $3,2 kobre ba kustu jestaun.

Reseita ne’ebé tama ne’e, mai husi kontribuisaun kontribuinte sira ba fundu hamutuk millaun $86,54 no pagamentu royalty simu husi Autoridade Nasionál Petróleu millaun $80,16.

Notísia relevante : Fundu Mina-Rai TL iha Trimestre Datoluk Biliaun $17,55

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here