Diretór Nasionál Transporte no Terrestre, Natalino do Rosário. Foto/Natalino Costa.

DILI, 03 fevereiru 2020 (TATOLI) – Diretór Nasionál Transporte Terrestre (DNTT), Natalino do Rosário, hateten DNTT ho Polísia Nasionál Timor-Leste (PNTL) seidauk bele halo operasaun konjunta tanba limitasaun fundu, maske antes ne’e instituisaun rua planeia ona iha fevereiru.

“Loos duni katak iha fulan kotuk, ami halo ona reuniaun koordenada ho parte PNTL atu halo operasaun konjunta hodi kontrola karreta ne’ebé movimenta bá-mai, maibé to’o ohin loron atividade ida ne’e seidauk bele realiza tanba fundu atu apoia ida ne’e seidauk iha”, nia ba TATOLI iha Balidi, ohin.

Nia esplika osan ba operasaun presiza duni tanba bele fasilita funsionáriu DNTT no membru PNTL atu hola bee no hahán ruma, hafoin halo serbisu.

“Ha’u hanoin operasaun ida ne’e rutina tanba ne’e maka ami mós sei haree bainhira funsionáriu DNTT tantu membru PNTL kuandu sira ba hamriik iha dalan hodi halo opresaun ba karreta sira, presiza bee no hahán, maibé agora daudaun ita enfrenta situasaun orsamentu duodésimu, entaun orsamentu atribui de’it ba nesesidade diresaun nian, maibé atu halo buat seluk laiha”, katak.

Maske nune’e, nia garante bainhira hato’o proposta ba ministériu maka hetan aprovasaun, signifika operasaun bele hala’o ona.

“Depende ba ministériu, kuandu sira aprova ona pedidu ami-nian, ita bele halo operasaun iha semana ida-ne’e ou bele semana oin tanba DNTT no PNTL ne’e preparadu ona, kuandu sira la aprova orsamentu, ha’u hanoin seidauk bele halo operasaun tanba funsionáriu no membru PNTL presiza bee no nesesidade seluk bainhira halo operasaun”, dehan.

Notísia relevante : Fevereiru, DNTT-PNTL Hahú Halo Operasaun Rutina ba Karreta no Motorizada

Jornalista : Natalino Costa

Editora : Maria Auxiliadora

HAKEREK NO HATÁN

Please enter your comment!
Please enter your name here