Sesaun plenária Parlamentu Nasionál. Imajen/TATOLI

DILI, 03 fevereiru 2020 (TATOLI)—Deputadu sira iha Parlamentu Nasionál (PN) rekomenda ba Prezidente Parlamentu Nasionál, Arão Noé de Jesus da Costa Amaral, atu fó votu solidariedade ba povu Xinés ne’ebé oras ne’e hasoru hela Virus Corona.

“Nasaun ne’ebé iha relasaun bilaterál ho ita di’ak tebes, ha’u hanoin katak iha tempu ne’ebé sira hasoru ka sira ultrapasa situasaun hanesan ne’e, ha’u rekomenda para Parlamentu Nasionál halo votu solidariedade ba ita-nia maluk sira nasaun viziñu sira, atubele fó korajen ba sira”, Deputada Bankada Partidu Demokrátiku (PD), Elvina Sousa rekomenda iha ámbitu debate urjénsia Virus Corona, iha plenária Parlamentu Nasionál, segunda ne’e.

Tanba, tuir nia, Parlamentu Nasionál sempre hato’o mensajen ka hato’o votu solidariedade. Ida-ne’e mós momentu di’ak ida tanba povu Xina hasoru hela problema.

Purtantu, Deputadu Bankada Parlamentár PLP, Abel Pires, apoia rekomendasaun Deputada Elvina Sousa nian kona-ba planu votu solidariedade ba Estadu Xina.

“Ita bele fó votu solidariedade ba Estadu no povu Xina kona-ba asuntu Virus Corona ne’e”, Deputadu Abel Pires informa.

Entretantu, Deputadu Bankada Parlamentár CNRT, José Virgílio konkorda hato’o votu solidariedade ba Governu no povu Xina.

“Ita iha Parlamentu bele fó votu solidariedade ba iha Xina tanba sira enfrenta hela situasaun ne’e”,  nia katak.

Kona-ba rekomendasaun ne’e, Prezidente Parlamentu Nasionál (PPN), Arão Noé de Jesus da Costa Amaral, simu pedidu ne’e.

“Votu solidariedade ne’e ita bele prepara ba aban”, PPN, Arão Noe, aviza liuhosi plenária.

Entretantu, Ministru Negósiu Estranjeiru no Kooperasaun, Dionísio da Costa Babo Soares, apresia ho rekomendasaun hosi reprezentante povu sira iha Parlamentu Nasionál.

“Se señor deputadu sira hato’o (votu solidariedade) di’ak liután para reforsa ita-nia kooperasaun”, Ministru Dionísio Babo hateten.

Jornalista: Evaristo Soares Martins

Editór: Xisto Freitas

HAKEREK NO HATÁN

Please enter your comment!
Please enter your name here