Vise-Governadór BCTL, Venâncio Maria Alves. Imajen Tatoli/Jogerjo Guterres

DILI, 03 fevereiru 2020 (TATOLI) – Banku Central de Timor-Leste (BCTL) konsidera retornu hosi Fundu Petróleu (FP) iha 2019 marka istória tanba sa’e ba biliaun U$2,1 kompara ho tinan sira anteriór.

“Iha trimestre ida ne’e (termina iha 31 dezembru), hetan retornu pozitivu millaun $530,32. Ne’e ba trimestre ida ikus nian de’it, tinan ida tomak (janeiru-dezembru) 2019 ita hetan biliaun $2,1, retornu Fundu Petróleu iha istória Fundu Petróleu durante ne’e, boot liu ona iha tinan 2019, iha tinan sira liubá iha 2017 ita hetan retornu biliaun $1,6”, Vise-Governadór BCTL, Venancio Alves Maria, informa iha lansamentu relatóriu Fundu Petrolíferu ba dala-58 iha edifísiu BCTL, Avenida Bispo Madeiro, ohin.

Official Investment BCTL, Agostinho Maia, Imajen /Jogerjo Guterres.

Relasiona ba retornu boot ne’e, Official Investment BCTL, Agostinho Maia, esplika retornu iha 2019 kontribui hosi fatór rua.

Primeiru maka; Banku Sentrál prinsipál sira hanesan Banku Sentrál Estadu Unidu Amérika (EUA), Banku Sentrál Uniaun Europeia nian, sira-nia polítika ne’ebé akomodativu, katak polítika ne’ebé sira trasa atu suporta nafatin atividade ekonomia liuliu hanesan hatún taxa jurus, tanba iha trimestre ikus ne’e Banku Sentrál EUA nian hatún tan taxa jurus dala ida porsentu 0,25 kompara ho antes entre porsentu 2,25 to’o porsentu 2,50.

“Ida ne’e ba-dala tolu iha tinan ida ne’e nia laran, tanba ne’e maka merkadu halo relasaun pozitiva tebetebes katak Banku Sentrál hakarak nafatin suporta atividade ekonomia globál”, nia dehan.

Agostinho hatutan, eventu ida maka; akordu negósiu entre EUA ho Xina, bainhira haree fali ba kotuk eventu ida ne’e, sempre fó impaktu negativu ba merkadu liuliu inserteza molok sira hetan akordu, maibé iha dezembru nia laran sira konsege anunsia katak prontu atu asina akordu ba faze dahuluk ba negosiasaun nian.

Nune’e iha akordu ne’e mós sira redús tarifa ne’ebé tau ba sira-nia sasán importasaun hosi EUA bá Xina, nune’e hosi Xina bá Amérika, ne’e mós kontribuisaun pozitiva tebetebes ba folin ativu finanseiru sira.

Kona-ba dadus ekonómiku, Official Investment ne’e dehan EUA ne’ebá maka nia ekonomia ne’e influénsia tebes iha mundu, ninia kreximentu ne’e pozitivu nafatin mezmu moderadu, ladún forte no Xina mós hanesan ekonomia kontinua pozitiva, maibé menus hosi pur volta porsentu 6 kreximentu anuál.

“Ida ne’e ita bele hatete katak nivel ne’ebé ki’ik liu iha tinan 10 ikus, maibé sei pozitivu nafatin no sira-nia Banku Sentrál mós sempre halo polítika oioin hodi hakarak suporta nafatin atividade ekonómika sira”, esplika.

Eventu ida tan maka relasaun ho Brexit. Agora liu hosi eleisaun ne’ebé sira hala’o iha dezembru 2019, entaun fó uitoan serteza ba polítika iha Reinu Unidu.

“Iha tinan ida ne’e nia laran iha eventu barak ne’ebé maka sei influensia merkadu ba oin, liuliu relasiona ba virus corona ne’ebé fó impaktu tebes ba atividade ekonomia globál, relasaun ba ida ne’e iha nasaun barak maka kansela viajen hosi nasaun seluk bá Xina no Xina bá nasaun seluk”, afirma.

Entaun, ne’e fó impaktu tebes ba atividade ekonomia globál, no mós iha tinan ne’e EUA sei realiza eleisaun prezidensiál, katak iha eleisaun ne’e kauza volatilidade (muda) makaas tebes iha merkadu finanseiru.

Notísia relevante : Prezidente Repúblika Veta Lei Fundu Petrolíferu

Jornalista : Antónia Gusmão

Editora : Maria Auxiliadora

HAKEREK NO HATÁN

Please enter your comment!
Please enter your name here